ડોલર સામે રૂપિયો નબળો બનતા NRIs ભારતમાં રોકાણ માટે આકર્ષાયા હતા જેના કારણે NRI ઈન્વેસ્ટમેન્ટમાં નોંધપાત્ર વધારો થયો હતો
ડોલર સામે રૂપિયો નબળો બનતા NRIs ભારતમાં રોકાણ માટે આકર્ષાયા હતા જેના કારણે NRI ઈન્વેસ્ટમેન્ટમાં નોંધપાત્ર વધારો થયો હતો. ફોરેન કરન્સી નોન-રેસિડેન્ટ (B) એકાઉન્ટ (FCNR(B))માં ઈન્વેસ્ટમેન્ટમાં મોટો ઉછાળો થયો હતો. FCNR (B)માં નાણાકીય વર્ષમાં 6.4 બિલિયિન ડોલરનો નેટ ઈનફ્લો હતો જે નાણાકીય વર્ષ 2025માં વધીને 7.1 બિલિયન ડોલર થયો છે. આમ તેમાં 11 ટકાનો ઉછાળો નોંધાયો છે. અગાઉ 2020-21 અને 2021-22 દરમિયાન NRIs દ્વારા ડિપોઝિટ પાછી ખેંચી લેવામાં આવી હતી જેના કારણે FCNR (B) કેટેગરી નેગેટિવ થઈ ગઈ હતી.
RBIના એન્યુઅલ રિપોર્ટના ડેટા પ્રમાણે FCNR (B)માં 2020-21 નાણાકીય વર્ષમાં -3.8 બિલિયન ડોલર અને 2021-22ના વર્ષમાં -3.6 બિલિયન ડોલરનો નેટ આઉટ ફ્લો નોંધાયો હતો. જોકે, આ બંને વર્ષે કોવિડ પેન્ડેમિકના વર્ષ હતા જેના કારણે NRIs દ્વારા ડિપોઝિટ પાછી ખેંચી લેવામાં આવી હતી.
જોકે, પેન્ડેમિક બાદ 2022-23માં નોન-રેસિડેન્ટ એક્સ્ટર્નલ એકાઉન્ટ (NRE), નોન-રેસિડેન્ટ ઓર્ડિનરી (NRO) એકાઉન્ટ અને FCNR (B)માં મળીને ઈનફ્લો વધ્યો હતો, અને 16.2 બિલિયન ડોલર નોંધાયો હતો, જે છેલ્લા 11 વર્ષમાં સૌથી વધારે હતો. જેમાંથી FCNR (B)નો હિસ્સો 44 ટકા હતો. RBI દ્વારા FCNR (B) પરની ઈન્ટરેસ્ટ રેટ કેપમાં વધારો કર્યો હતો, જેનાથી બેંકોને પણ સારું વળતર આપવાની મોકળાશ મળી હતી અને તેનાથી પણ ઈનફ્લોમાં વધારો થયો છે.
FCNR (B) એકાઉન્ટ NRIs અને પર્સન ઓફ ઈન્ડિયન ઓરિજિન (PIOs) માટેનું ફિક્સ્ડ ડિપોઝિટ એકાઉન્ટ છે. આની ખાસીયત એ છે કે NRIs કે PIOs તેમાં યુએસ ડોલર, બ્રિટિશ પાઉન્ડ, યુરો, ઓસ્ટ્રેલિયન ડોલર, કેનેડિયન ડોલર, સ્વિસ ફ્રેન્ક અને જાપાનીઝ યેન જેવી ઈન્ટરનેશનલ કરન્સી ડિપોઝિટ કરી શકે છે, જેનાથી ડિપોઝિટર્સને એક્સચેન્જ રેટમાં થતાં ફેરફાર સામે પ્રોટેક્શન મળે છે. ટર્મ ડિપોઝિટનો સમયગાળો એક વર્ષથી પાંચ વર્ષ સુધીનો હોય છે, ત્યારે FCNR(B) એકાઉન્ટ્સ પર મળતું વ્યાજ ભારતમાં ટેક્સ ફ્રી છે.
ગલ્ફ દેશોમાં NRI કસ્ટમર્સનો મોટો બેઝ ધરાવતી પ્રાઈવેટ સેક્ટરની સાઉથ ઈન્ડિયન બેંકનું કહેવું છે કે, છેલ્લા ત્રણ નાણાકીય વર્ષમાં NRE, NRO અને FCNR (B) એકાઉન્ટમાં સતત ગ્રોથ જોવા મળ્યો છે. જેમાં નાણાકીય વર્ષ 2023માં ત્રણ ટકા, 2024માં પાંચ ટકા અને 2025માં છ ટકાનો વધારો થયો હતો. બેંકનું કહેવું છે કે, યુએસ ડોલર જેવી ફોરેન કરન્સીની મજબૂતાઈ અને સ્થિરતાના કારણે NRIs આ એકાઉન્ટમાં રોકાણ કરવા માટે પ્રેરાયા છે. આ ઉપરાંત ભારતીય રૂપિયાના અવમૂલ્યનથી એક્સચેન્જ રેટના રિસ્ક સામે હેજ તરીકે ફોરેન કરન્સી ડિપોઝિટનું આકર્ષણ વધ્યું છે.
