મોરબી શહેરના ભીમરાવનગર વિસ્તારમાં છેલ્લા અંદાજે ૧૫ વર્ષથી પીવાના પાણીની ગંભીર સમસ્યા યથાવત રહેતાં સ્થાનિક રહિશોમાં ભારે રોષ ફેલાયો છે. નગરપાલિકા દ્વારા વારંવાર આશ્વાસન આપવામાં આવતાં હોવા છતાં આજદિન સુધી નિયમિત પાણી પુરવઠો શરૂ ન થતાં વિસ્તારના લોકો હવે આંદોલનના માર્ગે ઉતરવાની ચીમકી ઉચ્ચારી રહ્યા છે.
સ્થાનિક રહિશોના જણાવ્યા અનુસાર, નળજોડાણ માટે જરૂરી રકમ મહિનાઓ પહેલાં જ ભરપાઈ કરવામાં આવી હતી. તેમ છતાં અનેક ઘરોમાં હજુ સુધી પાણીના કનેક્શન આપવામાં આવ્યા નથી. અનેક વખત નગરપાલિકામાં રજૂઆતો કરવા છતાં યોગ્ય કાર્યવાહી ન થતાં લોકોમાં નિરાશા અને આક્રોશ વ્યાપ્યો છે.
રહિશોએ આક્ષેપ કર્યો છે કે વર્ષોથી વિવિધ સરકારી કચેરીઓ અને અધિકારીઓ સમક્ષ રજૂઆતો કરવા છતાં સમસ્યાનું કોઈ સ્થાયી નિરાકરણ આવ્યું નથી. ગરીબ અને પછાત વિસ્તારમાં આવતી આ વસાહત સાથે તંત્ર દ્વારા ભેદભાવભર્યું વર્તન કરવામાં આવતું હોવાનો પણ આક્ષેપ કરવામાં આવ્યો છે.
વિસ્તારના આગેવાનોના જણાવ્યા મુજબ, વર્ષ ૨૦૨૪માં કેટલાક ઘરો માટે નવા પાણી કનેક્શનની પ્રક્રિયા શરૂ કરવામાં આવી હતી અને રહિશો પાસેથી રકમ પણ વસૂલવામાં આવી હતી, પરંતુ ત્યારબાદ કામ અધૂરું રહી ગયું. પરિણામે લોકોને આજે પણ શુદ્ધ પીવાના પાણી માટે વલખાં મારવા પડી રહ્યા છે.
રહિશોએ ચેતવણી આપી છે કે જો તાત્કાલિક ધોરણે પાણીની લાઇન શરૂ કરીને તમામ ઘરોને કનેક્શન આપવામાં નહીં આવે તો આગામી દિવસોમાં મોરબી મહાનગરપાલિકા કચેરી ખાતે ઉપવાસ આંદોલન તેમજ સામૂહિક વિરોધ કાર્યક્રમો યોજવામાં આવશે.
