જૂનાગઢ; તા. ૦૪/૧૧/૨૦૨૬, જૂનાગઢ ખાતે યોજાયેલા જિલ્લા કક્ષાના સિનિયર સિટીઝન રમતોત્સવમાં જૂનાગઢના જાણીતા સર્જન ડૉ. શૈલેશ બારમેડાએ ઉત્કૃષ્ટ પ્રદર્શન કરીને બે ગોલ્ડ મેડલ અને ક્રિકેટની ચેમ્પિયન ટ્રોફી હાંસલ કરી ગૌરવપૂર્ણ સિદ્ધિ મેળવી છે. ૬૦ વર્ષની ઉંમરે રમતગમત ક્ષેત્રે તેમની આ સફળતા શારીરિક સ્ફૂર્તિ, અડગ મનોબળ અને રમત પ્રત્યેના અખૂટ જુસ્સાનું પ્રેરણાદાયી ઉદાહરણ બની છે.
ગુજરાત સરકારના રમતગમત, યુવા અને સાંસ્કૃતિક પ્રવૃત્તિ વિભાગ તથા સ્પોર્ટ્સ ઓથોરિટી ઓફ ગુજરાત, ગાંધીનગરના માર્ગદર્શન હેઠળ જૂનાગઢ જિલ્લા રમત પ્રશિક્ષણ કેન્દ્ર દ્વારા તા. ૨ નવેમ્બર, ૨૦૨૬ના રોજ ગાંધીગ્રામ સ્થિત સરદાર પટેલ સ્પોર્ટ્સ કોમ્પ્લેક્સ ખાતે જિલ્લા કક્ષાની સિનિયર સિટીઝન રમતગમત સ્પર્ધાનું ભવ્ય આયોજન કરવામાં આવ્યું હતું. આ સ્પર્ધામાં ૬૦ વર્ષથી વધુ વયના ૧૦૦થી વધુ સિનિયર સિટીઝન ખેલાડીઓએ ઉત્સાહભેર ભાગ લીધો હતો.
આ રમતોત્સવમાં ડૉ. શૈલેશ બારમેડાએ ૧૦૦ મીટર અને ૨૦૦ મીટરની દોડ સ્પર્ધામાં પ્રથમ સ્થાન મેળવી બે ગોલ્ડ મેડલ પોતાના નામે કર્યા હતા. આ ઉપરાંત, તેમની ક્રિકેટ ટીમે પણ શાનદાર પ્રદર્શન કરીને ચેમ્પિયન ટ્રોફી જીતી હતી. આ રીતે તેમણે વ્યક્તિગત તેમજ ટીમ સ્પર્ધામાં ઉત્કૃષ્ટ દેખાવ કરીને પોતાની રમતગમત પ્રતિભાનો પરિચય કરાવ્યો હતો.
ઉલ્લેખનીય છે કે ડૉ. શૈલેશ બારમેડા એક કુશળ અને અનુભવી સર્જન હોવાની સાથે રમતગમત, સાહસિક પ્રવૃત્તિઓ અને પ્રકૃતિપ્રેમી તરીકે પણ વિશેષ ઓળખ ધરાવે છે. તબીબી વ્યવસાયની વ્યસ્તતા વચ્ચે પણ તેઓ નિયમિત કસરત, સાયકલિંગ, સ્વિમિંગ, યોગ, ટ્રેકિંગ સહિતની વિવિધ શારીરિક અને રમતગમતની પ્રવૃત્તિઓમાં સક્રિય રહે છે. તેમની જીવનશૈલીમાં શારીરિક તંદુરસ્તી, શિસ્ત અને સક્રિયતાને વિશેષ સ્થાન છે.
૬૦ વર્ષની ઉંમરે રમતગમત ક્ષેત્રે ત્રણ મહત્વપૂર્ણ સિદ્ધિઓ હાંસલ કરીને ડૉ. બારમેડાએ સાબિત કર્યું છે કે ઉંમર માત્ર એક આંકડો છે. જો વ્યક્તિમાં ઉત્સાહ, શારીરિક સ્ફૂર્તિ, આત્મવિશ્વાસ અને દૃઢ સંકલ્પ હોય તો કોઈપણ ઉંમરે નવી ઊંચાઈઓ સર કરી શકાય છે.
ડૉ. શૈલેશ બારમેડાની આ સિદ્ધિ યુવા પેઢી માટે તંદુરસ્ત જીવનશૈલી અપનાવવાની પ્રેરણા પૂરી પાડે છે, તો સિનિયર સિટીઝન માટે પણ ઉંમરના કોઈપણ તબક્કે સક્રિય અને ઉત્સાહપૂર્ણ જીવન જીવવાનો પ્રેરણાદાયી સંદેશ આપે છે.
