Category: Featured

રશિયાના પ્રમુખ વ્લાદિમીર પુતિન તેમની ભારત મુલાકાત પહેલાં વડાપ્રધાન નરેન્દ્ર મોદીના નેતૃત્વની જોરદાર પ્રશંસા કરી છે. તેમણે ભારપૂર્વક જણાવ્યું કે, ‘PM મોદી કોઈના દબાણ સામે ઝૂકી જાય તેવા નેતા નથી.’ પુતિનનું આ નિવેદન એવા સમયે આવ્યું છે જ્યારે રશિયા અને ભારત બંને અમેરિકાના ટેરિફ અને આંતરરાષ્ટ્રીય દબાણોનો સામનો કરી રહ્યા છે.

પુતિને ભારતની અડગ નીતિની પ્રશંસા કરી

એક મીડિયા ઇન્ટરવ્યુમાં અમેરિકા દ્વારા ભારત પર લાદવામાં આવેલા ટેરિફ અંગેના સવાલના જવાબમાં રશિયાના પ્રમુખ પુતિને પીએમ મોદીના નેતૃત્વ પર વિશ્વાસ વ્યક્ત કર્યો હતો. તેમણે કહ્યું કે, ‘વડાપ્રધાન નરેન્દ્ર મોદી એવા નેતા નથી કે જે દબાણ સામે ઝૂકી જાય. દુનિયાએ ભારતની અડગ નીતિ જોઈ છે અને દેશને તેના નેતૃત્વ પર ગર્વ હોવો જોઈએ.’

ભારત-રશિયાના ગાઢ સંબંધો

રશિયાના પ્રમુખ વ્લાદિમીર પુતિનની આ મુલાકાત દરમિયાન અનેક મોટા કરારો પર હસ્તાક્ષર થવાની અપેક્ષા છે, ત્યારે તેમણે બંને દેશો વચ્ચેના સહયોગની વ્યાપકતા પર ભાર મૂકતાં કહ્યું કે, ‘ભારત અને રશિયા વચ્ચે 90 ટકાથી વધુ દ્વિપક્ષીય વ્યવહારો સફળતાપૂર્વક પૂર્ણ થયા છે.’

આ ઉપરાંત રશિયાના પ્રમુખ વ્લાદિમીર પુતિને જણાવ્યું કે ચર્ચા કરવા માટે ઘણું બધું છે, કારણ કે ભારત અને રશિયા વચ્ચે સહયોગનો વ્યાપ ખૂબ વ્યાપક છે. તેમણે બંને દેશો વચ્ચેના ખાસ ઐતિહાસિક સંબંધો પર ભાર મૂક્યો હતો અને સ્વતંત્રતા પછી માત્ર 77 વર્ષમાં ભારતે જે નોંધપાત્ર વિકાસ હાંસલ કર્યો છે, તેની પ્રશંસા કરી હતી. નોંધનીય છે કે, પુતિનનું આ નિવેદન ભારત-રશિયાના સંબંધોની મજબૂતી અને વૈશ્વિક રાજકારણમાં ભારતના વધતાં કદને દર્શાવે છે.

પુતિનની 10મી મુલાકાત

ઉલ્લેખનીય છે કે, પુતિનની આ ડિસેમ્બરની મુલાકાત ભારતની તેમની દસમી મુલાકાત હશે. આમાંથી ત્રણ મુલાકાતો વડાપ્રધાન નરેન્દ્ર મોદીના કાર્યકાળ દરમિયાન (2016, 2018 અને 2021) થઈ હતી. વડાપ્રધાન મોદી પણ અત્યાર સુધીમાં સાત વખત રશિયાની મુલાકાત લઈ ચૂક્યા છે.

પાકિસ્તાનમાં એચઆઈવી ચેપમાં તીવ્ર વધારો થયો હોવાના સમાચાર છે. વિશ્વ આરોગ્ય સંસ્થા (WHO)ના ડેટા અનુસાર, 2010 માં પાકિસ્તાનમાં 16,000 નવા એચઆઈવી કેસ નોંધાયા હતા, જે 2024 સુધીમાં વધીને 48,000 થઈ ગયા છે.

છેલ્લા 15 વર્ષોમાં બેફામ વધારો થતાં હવે આ સંક્રમણ માત્ર કેટલાક વિશિષ્ટ જૂથો સુધી મર્યાદિત ન રહેતાં સમાજના વ્યાપક વર્ગોમાં ફેલાઈ ગયો છે. ડબલ્યુએચઓ એ ચેતવણી આપી છે કે, જો આ સ્થિતિને તાત્કાલિક અંકુશમાં લેવામાં ન આવી તો તે દેશની પાકિસ્તાનની ભાવિ પેઢીઓ માટે વિનાશકારી પરિણામો લાવી શકે છે.

નવા કેસોની સંખ્યામાં ત્રણ ગણો વધારો!

પાકિસ્તાનમાં છેલ્લા દોઢ દાયકામાં એચઆઈવીના નવા ચેપના કેસોમાં ભયંકર વૃદ્ધિ નોંધાઈ છે. ડબલ્યુએચઓ ના ડેટા અનુસાર, વર્ષ 2010 માં અંદાજે 16,000 નવા રોગી નોંધાયા હતા, જ્યારે વર્ષ 2024 સુધીમાં આ આંકડો વધીને લગભગ 48,000 સુધી પહોંચી ગયો છે.

એટલે કે, આ સમયગાળામાં નવા કેસોની સંખ્યામાં ત્રણ ગણો વધારો થયો છે. આ વૃદ્ધિ ઉંમર, લિંગ કે સામાજિક વર્ગનો ભેદભાવ કર્યા વિના સમાજના પ્રત્યેક વર્ગને પ્રભાવિત કરી રહી હોવાની નોંધ ડબલ્યુએચઓ એ લીધી છે. એવો અંદાજ છે કે પાકિસ્તાનમાં 3,50,000 લોકો એચઆઈવી થી પીડાય છે. બીજી તરફ, અહીંના લોકોને એચઆઈવી સંક્રમણ બાબતે જાગૃત જ નથી.

વિશ્વ આરોગ્ય સંસ્થાનું ગંભીર અનુમાન

ડબલ્યુએચઓ ના અધિકારીઓએ આ પરિસ્થિતિ પ્રત્યે ગંભીર ચિંતા વ્યક્ત કરતા કહ્યું છે કે, અગાઉ એચઆઈવી નો પ્રસાર મુખ્યત્વે ઇન્જેક્શન દ્વારા નશીલા પદાર્થોનો ઉપયોગ કરનારા લોકો અથવા અસુરક્ષિત પ્રક્રિયાથી રક્ત સ્વીકારનારા લોકો સુધી મર્યાદિત હતો, પરંતુ હવે આ ચેપ સામાન્ય સમુદાયો, ઘરગથ્થુ મહિલાઓ અને નિર્દોષ બાળકોમાં પણ ઝડપથી પ્રવેશ કરી રહ્યો છે. ડબલ્યુએચઓ એ ચેતવણી આપી છે કે, બાળકોને અસર કરતો આ રોગચાળો દેશના ભવિષ્ય માટે એક વિકટ પડકાર બની શકે છે. ભાવિ પેઢીને સુરક્ષિત રાખવા માટે તાત્કાલિક સામૂહિક પ્રયાસોની આવશ્યકતા છે.

એચઆઈવીના ફેલાવા માટે જવાબદાર મુખ્ય કારણો

પાકિસ્તાનમાં એચઆઈવીના બેહિસાબ ફેલાવા માટે જવાબદાર મુખ્ય કારણોમાં ‘અસુરક્ષિત રક્તદાન ને ઇન્જેક્શન સલામતીની નબળી પ્રણાલીઓ’, ‘હોસ્પિટલોમાં ચેપ નિયંત્રણના પગલાંનો અભાવ’, ‘સગર્ભાઓમાં નિયમિત એચઆઈવી પરીક્ષણની કમી’, ‘અસુરક્ષિત લૈંગિક સંબંધો’ અને ‘રોગ વિશેની જાગૃતિ/શિક્ષણની તીવ્ર કમી’ને ગણાવાયા છે.

એક ભયંકર સત્ય એ છે કે, 0 થી 14 વર્ષની વયનાં બાળકોમાં નવા કેસોની સંખ્યા 2010 માં 530 હતી તે વધીને 2023 માં 1,800 થઈ ગઈ છે. બેનઝીરાબાદ, નૌશહરો ફિરોઝ, તૌંસા, શિકારપુર, લરકાના, જેકોબાબાદ અને મીરપુર ખાસ જેવા શહેરોમાં તો એચઆઈવી સંક્રમણનો ભોગ બનેલા 80 ટકા દર્દી બાળકો છે. આ હકીકત બાળ વસ્તી પરના ગંભીર જોખમને ઉજાગર કરે છે.

સામુહિક પ્રતિકાર અને ભવિષ્યનો માર્ગ

ડબલ્યુએચઓ નું કહેવું છે કે, આ પડકારનો સામનો કરવો શક્ય છે, પરંતુ તે માટે સત્તાવાર, સામાજિક અને તબીબી સ્તરે સંકલિત પ્રયાસો કરવા જરૂરી છે. સરકાર, આરોગ્ય સંસ્થાઓ, મીડિયા અને સમાજના નેતાઓએ ભેગા મળીને જનતામાં એચઆઈવી બાબતે જાગૃતિ ફેલાવે એ જરૂરી છે. સર્વસુલભ અને ગુપ્તતા ન જોખમાય એવી પરીક્ષણ સેવાઓ વિકસાવીને ચેપગ્રસ્ત લોકોને સમયસર અને કાર્યક્ષમ ઉપચાર (એન્ટિરેટ્રોવાઇરલ થેરપી) પૂરી પાડવી જરૂરી છે.

જો આવા પગલાં સખતાઈથી અને વેગથી ન લેવામાં આવ્યા તો એચઆઈવી/એઇડ્સનો રોગચાળો માત્ર એક આરોગ્ય સંકટ જ નહીં, પરંતુ પાકિસ્તાનના સામાજિક માળખા, માનવીય મૂલ્યો અને આર્થિક સ્થિરતા માટે પણ એક ગહન અને દૂરગામી પડકાર સાબિત થઈ શકે છે.

સંરક્ષણ મંત્રી રાજનાથ સિંહે આજે (4 ડિસેમ્બર) દિલ્હીના માણેકશૉ સેન્ટર ખાતે રશિયાના સંરક્ષણ મંત્રી આન્દ્રેઈ બેલોઉસોવ સાથે બેઠક યોજીને ભારત-રશિયાના દોસ્તી અંગે મહત્ત્વની વાત કરી છે. રાજનાથ સિંહે કહ્યું છે કે, ‘રશિયા આજે પણ ભારતનો વ્યૂહાત્મક અને વિશ્વાસપાત્ર ભાગીદાર છે, ખાસ કરીને સંરક્ષણ અને તકનીકી સહયોગના ક્ષેત્રમાં…’

બંને દેશોના સંબંધો મજબૂત

રાજનાથ સિંહે કહ્યું કે, ‘વૈશ્વિક ભૂ-રાજકીય પરિવર્તનો છતાં બંને દેશોના સંબંધો અડીખમ રહ્યા છે. વડાપ્રધાન નરેન્દ્ર મોદી અને રાષ્ટ્રપ્રમુખ વ્લાદિમીર પુતિન વચ્ચે સતત સંવાદ થવાના કારણે બંને દેશોના સંબંધો વધુ ગાઢ બન્યા છે.’ બેઠકમાં સૈન્ય ઉત્પાદન, સંયુક્ત વિકાસ, લાયસન્સવાળી મેન્યુફેક્ચરિંગ અને તકનીકી હસ્તાંતરણ સહિતના તમામ મહત્ત્વના ક્ષેત્રો પર વિગતવાર ચર્ચા થઈ હતી.

2030 સુધી 100 અબજ ડૉલરના વેપારનું લક્ષ્ય

રશિયા-ભારત હવે વેપારી ભાગીદારીને નવી ઊંચાઈઓ પર લઈ જવા માટે તૈયાર છે. રશિયાના નાણા મંત્રી એન્ટોન સિલુઆનોવે આશા વ્યક્ત કરી કે ‘બંને દેશો 2030 સુધીમાં 100 અબજ અમેરિકી ડૉલરના વાર્ષિક વેપાર લક્ષ્યાંકને પ્રાપ્ત કરી શકે છે. 2018માં નિર્ધારિત કરાયેલ 30 અબજ ડૉલરનું લક્ષ્ય આજે 68 અબજ ડૉલર સુધી પહોંચી ગયું છે, જે અપેક્ષા કરતાં વધુ છે. બંને દેશોના વેપારમાં વૃદ્ધિ પાછળ ઊર્જા, સંરક્ષણ, નાણાકીય સેવાઓ અને ઉદ્યોગો વચ્ચેનો વધતો સહયોગ જવાબદાર છે.’ આમ છેલ્લા સાત વર્ષમાં વેપાર ભાગીદારી છસ્સો ટકા વધી ગઈ છે.

બંને દેશો વચ્ચે સંરક્ષણ ક્ષેત્રે મહત્ત્વની ભાગીદારી

દાયકાઓથી, રશિયા ભારતનું સૌથી મોટું અને મહત્ત્વપૂર્ણ શસ્ત્ર સપ્લાયર રહ્યું છે. ભારતીય વાયુસેનાના સુખોઈ Su-30 MKI લડાકુ વિમાનો, મિગ સિરીઝના વિમાનો, અને ભારતીય સેનાના મુખ્ય યુદ્ધ ટેન્ક T-90 તેમજ સબમરીન રશિયા પાસેથી મેળવવામાં આવી છે. રશિયાએ અન્ય દેશોની તુલનામાં ભારતને સંરક્ષણ ટૅક્નોલૉજી ટ્રાન્સફર કરવામાં હંમેશા વધુ સહકાર આપ્યો છે. બંને દેશોએ ભેગા મળીને વિશ્વની સૌથી ઝડપી બ્રહ્મોસ મિસાઇલ બનાવેલી છે. આ ઉપરાંત ભારતમાં જ લાયસન્સ હેઠળ Su-30 MKI વિમાનો અને T-90 ટેન્કનું નિર્માણ થઈ રહ્યું છે.

બંને દેશો વચ્ચે કયાં વર્ષે કેટલી વેપાર ભાગીદારી વધી

2024-25 – 80 બિલિયન ડૉલર

2023-24 – 68 બિલિયન ડૉલર

2022-23 – 49.9 બિલિયન ડૉલર

2021-22 – 13.1 બિલિયન ડૉલર

2020-21 – 8.1 બિલિયન ડૉલર

2019-20 – 10.9 બિલિયન ડૉલર

2018-19 – 11.9 બિલિયન ડૉલર

મોરબીના જોધપર નજીક આવેલ મચ્છુ 2 ડેમમાં નર્મદા પાણીની આવક ચાલુ છે અને ડેમ સંગ્રહશક્તિના 100 ટકા ભરાઈ ગયો છે જેથી તા. 02 ના બપોરે…

મોરબીના જોધપર નજીક આવેલ મચ્છુ 2 ડેમમાં નર્મદા પાણીની આવક ચાલુ છે અને ડેમ સંગ્રહશક્તિના 100 ટકા ભરાઈ ગયો છે જેથી તા. 02 ના બપોરે 2 કલાકે ડેમનો એક દરવાજો અડધો ફૂટ ખોલવામાં આવ્યો છે જેથી 323 કયુસેક ઇન્ફ્લો સામે 323 કયુસેક આઉટફલો જોવા મળી રહ્યો છે.

ડેમનો દરવાજો ખોલવામાં આવતા મોરબી તાલુકાના જોધપર, લીલાપર, ભડિયાદ, ટીંબડી, ધરમપુર, રવાપર, અમરેલી, વનાળીયા, ગોર ખીજડીયા, માનસર, નવા સાદુળકા, જુના સાદુળકા, રવાપર નદી, ગુંગણ, નારણકા, બહાદુરગઢ, નવા નાગડાવાસ, જુના નાગડાવાસ, સોખડા અને અમરનગર એમ 20 ગામો તેમજ માળિયા તાલુકાના વીરવિદરકા, દેરાળા, નવાગામ, મેઘપર, હરીપર, મહેન્દ્રગઢ, ફતેપર, સોનગઢ અને માળિયા (મી.) એમ 09 ગામો મળીને કુલ 29 ગામોને એલર્ટ આપવામાં આવ્યું છે.

વોટ્સએપ હાલમાં નવા ફીચર પર કામ કરી રહ્યું છે જેની મદદથી નવા ગ્રૂપ મેમ્બર પણ ભૂતકાળની ચેટને વાંચી શકશે. આ ફીચરમાં રિસેન્ટ હિસ્ટ્રી શેરિંગ કહેવામાં આવી રહ્યું છે. આ ફીચર પણ હજી પણ કામ ચાલી રહ્યું છે અને એ પૂરું થયા બાદ એને બીટા વર્ઝનમાં ટેસ્ટિંગ માટે મોકલવામાં આવશે. નવા યુઝર્સ જ્યારે પણ ગ્રૂપ જોઈન કરે તો તેઓ પણ આગળની ચેટ વાંચીને અન્ય મેમ્બર્સ સાથે એ વિશે વાત કરી શકે અને જાણી શકે એ માટે આ વર્ઝનને બનાવવામાં આવી રહ્યું છે.

રિસેન્ટ હિસ્ટ્રી શેરિંગ કેવી રીતે કામ કરશે? 

રીસેન્ટ હિસ્ટ્રી શેરિંગ ફીચરમાં નવા ગ્રૂપ મેમ્બર્સને જૂના ગ્રૂપ મેમ્બર્સની ભૂતકાળની થોડી વાતચીતને એક વિન્ડોમાં ચેટ હિસ્ટ્રી તરીકે રજૂ કરવામાં આવશે. જો એડમિન દ્વારા આ સુવિધા આપવા માટે પરવાનગી આપવામાં આવી હશે તો જ યુઝરને એ જોવા મળશે. એડમિન ઇચ્છે તો એને બંધ કરી શકે છે. આ દરેક મેસેજ એન્ડ-ટૂ-એન્ડ ઇન્ક્રિપ્ટેડ હશે આથી જે યુઝરને એ ચેટ હિસ્ટ્રી દેખાડવામાં આવશે એ જ એને જોઈ શકશે.

એડમિન કરી શકશે ફીચરને કન્ટ્રોલ 

એડમિન પાસે આ ફીચરને કન્ટ્રોલ કરવાની પરવાનગી હશે. એડમિન પાસે ગ્રૂપ પરમિશન માટેના કન્ટ્રોલ હોય છે અને એમાં રિસેન્ટ હિસ્ટ્રી ફીચર ચાલુ હશે તો જ એને યુઝર જોઈ શકશે. જો આ ફીચર ચાલુ હશે તો એ બેકગ્રાઉન્ડમાં ઓટોમેટિક કામ કરતું રહેશે અને જ્યારે કોઈ નવો યુઝર આવશે એને એ દેખાડવામાં આવશે. વોટ્સએપ દ્વારા હાલમાં છેલ્લા 24 કલાકની વાતચીત દેખાડવામાં આવશે, પરંતુ ભવિષ્યમાં આ ટાઇમને પણ એડમિન પોતાની રીતે પસંદ કરી શકશે. એટલે કે 24 કલાક કરતાં પણ વધુ સમય માટેની વાતચીતને જોઈ શકાશે.

ડેટા મેનેજમેન્ટને પણ પ્રાધાન્ય આપવામાં આવશે 

વોટ્સએપ દ્વારા આ ફીચરમાં હાલમાં છેલ્લા 24 કલાકની હિસ્ટ્રી દેખાડવામાં આવશે એમ કહેવામાં આવ્યું છે. જોકે ઘણાં ગ્રૂપ એવા હોય છે જે ખૂબ જ એક્ટિવ હોય છે અને એમાં ઘણાં મીડિયા પણ શેર થતાં હોય છે. આથી વોટ્સએપ દ્વારા 24 કલાકની સાથે ડેટાને મેનેજ કરવા માટે ફક્ત 1000 મેસેજ દેખાડવાનું નક્કી કરવામાં આવ્યું છે. જો મેસેજ વધુ હશે તો ફક્ત 1000 મેસેજ જ જોઈ શકાશે નહીંતર છેલ્લા 24 કલાકની ચેટ. આ ફીચરની મદદથી યુઝરને ડેટા પણ બચશે અને એપ્લિકેશન ઓવરલોડ પણ નહીં થાય.

ગ્રૂપ ઇનવાઇટ લિંકમાં પણ કામ કરશે આ ફીચર 

ગ્રૂપમાં એડ કર્યા હોય એ જ યુઝર આ ફીચરનો ઉપયોગ કરી શકશે એવું નથી. એડમિન દ્વારા કોઈને ઇનવાઇટ કરવામાં આવ્યું હોય અથવા તો ગ્રૂપમાં જોડાવવા માટેની લિંક બનાવવામાં આવી હોય તો એ લિંક દ્વારા જોડાનાર યુઝર પણ આ ફીચરનો ઉપયોગ કરી શકશે. આથી કઈ વ્યક્તિ ક્યારે અને કેવી રીતે જોડાશે એ મહત્ત્વનું નથી, પરંતુ દરેક નવા યુઝર્સને એક સરખા ફીચરનો ઉપયોગ કરવા મળે એને વધુ મહત્ત્વ આપવામાં આવ્યું છે.

Pan Masala MRP Rule : પાન મસાલાને લઈને કેન્દ્ર સરકારે વધુ એક મોટો નિર્ણય લીધો છે. કાનૂની મેટ્રોલૉજી (પેકેજ્ડ કોમોડિટીઝ) બીજા સુધારા નિયમો, 2025 અનુસાર, હવે તમામ કદ અને વજનના પાન મસાલા પેક પર છૂટક વેચાણ કિંમત (MRP/RSP) અને અન્ય તમામ સંબંધિત માહિતી દર્શાવવી ફરજિયાત છે.

ગ્રાહક બાબતોના વિભાગના સંયુક્ત સચિવ અનુપમ મિશ્રાના આદેશ મુજબ, આ નિયમ 1 ફેબ્રુઆરી, 2026થી લાગુ થશે. આ પછી તમામ પાન મસાલા ઉત્પાદકો, પેકરો અને આયાતકારોએ તેનું પાલન કરવું પડશે.

પાન મસાલા પેકેટ પર MRPનો નિયમ બદલ્યો

તમને જણાવી દઈએ કે, અત્યાર સુધીમાં 10 ગ્રામ કે તેથી ઓછા વજનના નાના પાન મસાલા પેકેટ પર MRP ન લખવાની છૂટ હતી. જ્યારે હવે તેના પર RSP દર્શાવવાની અનિવાર્ય છે. હવે દરેક પાન મસાલા પેકેટ પર લીગલ મેટ્રોલૉજી રૂલ્સ, 2011માં દર્શાવેલા તમામ ઘોષણાઓમાં વજન, ઉત્પાદન તારીખ, ઉત્પાદકનું નામ, વગેરે સ્પષ્ટપણે દર્શાવવું ફરજિયાત છે. અગાઉ નાના પેકને નિયમ 26(A) હેઠળ ચોક્કસ માહિતી દર્શાવવાથી મુક્તિ આપવામાં આવી હતી, પરંતુ હવે આ મુક્તિ દૂર કરવામાં આવી છે અને નવા નિયમો લાગુ કરવામાં આવ્યા છે.

સરકારના નવા નિયમ મુજબ હવે નાના પેકેટ પર સ્પષ્ટ MRP લખવી પડશે. જેનાથી હવે કોઈપણ વધારે કે ઓછી રકમ વસૂલી નહીં શકાય અને ગ્રાહકો યોગ્ય જાણકારીથી તેની ખરીદી કરી શકશે. જેને પગલે બજારમાં પારદર્શિતા આવશે.

નવા નિયમના અમલીકરણ સાથે, સરકારને આશા છે કે રિટેલ સેલિંગ પ્રાઇસ(RSP)ના આધારે પાન મસાલા પર GSTનું સચોટ મૂલ્યાંકન થશે. આનાથી GST કાઉન્સિલના નિર્ણયોનું વધુ સારી રીતે પાલન થશે. નાના હોય કે મોટા, દરેક પેકેજ પર યોગ્ય કર વસૂલાત કરવામાં આવશે. આનાથી કરચોરી પર પણ અંકુશ આવશે.

જો તમે આર્ટિફિશિયલ ઇન્ટેલિજન્સ(AI)નો ઉપયોગ કરીને ફેક ન્યૂઝ કે ફેક વીડિયો ફેલાવતા હોય તો હવે તમે મુશ્કેલીમાં મૂકાઈ શકો છે. વાસ્તવમાં બુધવારે સંસદમાં આ મુદ્દો ઉઠાવવામાં આવ્યો છે, જેમાં કડક કાયદો ઘડવાની અને ફેક ન્યૂઝ-વીડિયો ફેલનારાઓ વિરુદ્ધ 36 કલાકમાં કાર્યવાહી કરવાનો ઉલ્લેખ કરાયો છે.

ફેક ન્યૂઝ ભારતના લોકતંત્ર માટે મોટો ખતરો

કેન્દ્રીય સૂચના અને પ્રસારણ મંત્રી અશ્વિની વૈષ્ણવે લોકસભાને જણાવ્યું હતું કે, ‘આ અત્યંત ગંભીર મુદ્દો છે અને ફેક ન્યૂઝ ભારતના લોકતંત્ર માટે મોટો ખતરો ઊભો કરી રહ્યું છે. ખોટી માહિતી અને એઆઇ દ્વારા તૈયાર કરાયેલા ડીપફેક પર કડક કાર્યવાહી કરવાની તાત્કાલિક જરૂર છે.’

કડક પગલાં લેવા અને કાયદાકીય માળખાને વધુ મજબૂત કરવાની જરૂર

અશ્વિની વૈષ્ણવે ચિંતા વ્યક્ત કરી કે, ‘સોશિયલ મીડિયાના ઉપયોગની પદ્ધતિને કારણે એક એવી ઈકોસિસ્ટમ બની ગઈ છે, જે ભારતના બંધારણનું અને સંસદ દ્વારા બનાવેલા કાયદાઓનું પાલન કરવા તૈયાર નથી. આના પર નિયંત્રણ લાવવા માટે કડક પગલાં લેવા અને કાયદાકીય માળખાને વધુ મજબૂત બનાવવાની તાત્કાલિક જરૂરિયાત છે.’

36 કલાકમાં વાંધાજનક કન્ટેન્ટ હટાવવાની વ્યવસ્થા

સંસદમાં એક સવાલના જવાબમાં વૈષ્ણવે કહ્યું કે, ‘સરકારે હાલમાં જ નવા નિયમો લાગુ કર્યા છે, જેમાં 36 કલાકની અંદર વાંધાજનક કન્ટેન્ટ દૂર કરવાની બાબત સામેલ છે. એઆઇ દ્વારા બનેલા ડીપફેકની ઓળખ કરવા અને તેના પર કાર્યવાહી કરવા માટેના ડ્રાફ્ટ નિયમો પણ બહાર પાડવામાં આવ્યા છે, જેના પર હાલમાં વિચારણા ચાલી રહી છે. ફેક ન્યૂઝના મુદ્દાને હલ કરવા માટે અભિવ્યક્તિની સ્વતંત્રતા અને લોકતંત્રની સુરક્ષા વચ્ચે એક નાજુક સંતુલન જાળવવું જરૂરી છે અને સરકાર આ દિશામાં કામ કરી રહી છે.’

મોરબીમાં સહાય મેળવવા હાલ કુલ ૧.૨૨ લાખ ખેડૂતોએ અરજી કરી; બાકી ખેડૂતોએ ૫ ડિસેમ્બર સુધીમાં સત્વરે અરજી કરવા વહિવટી તંત્રનો અનુરોધ

ઓક્ટોબર માસમાં થયેલા વરસાદના કારણે નુકસાન પામેલ ખેતી પાકો માટે રાજ્ય સરકાર દ્વારા જાહેર કરાયેલા કૃષિરાહત પેકેજ ઓક્ટોબર ૨૦૨૫ અંતર્ગત મોરબી જિલ્લામાં સહાય ચૂકવવાની કામગીરી પૂરજોશમાં ચાલી રહી છે. માત્ર અઠવાડિયાના ટૂંકા ગાળામાં જ હજારો ખેડૂતોના ખાતામાં કરોડો રૂપિયા જમા થઈ ચૂક્યા છે. ૪૨,૯૬૪ ખેડૂતોને ૧૪૪ થી વધુની નાણાકીય સહાય ચુકવવામાં આવી છે. જમા કરી દેવામાં આવ્યા છે.

તા. ૧૪/૧૧/૨૦૨૫ થી તા. ૨૯/૧૧/૨૦૨૫ સુધીમાં જિલ્લાભરમાંથી કુલ ૧,૨૨,૪૭૧ જેટલી ખેડૂતો ખાતેદારો દ્વારા પાક નુકસાની સહાય મેળવવા માટે અરજીઓ કરવામાં આવી છે. ત્યાર બાદ ખેડૂતો અરજી કરવામાં બાકી ન રહી જાય તે હેતુથી સરકાર દ્વારા વધુ ૭ દિવસ એટલે ૦૫-૧૨-૨૦૨૫ સુધી સમય મર્યાદા વધારી દેવામાં આવી છે. જિલ્લા વહીવટી તંત્ર દ્વારા રાત દિવસ કામગીરી કરી આજ દિન સુધીમાં ૪૨,૯૬૪ ખેડૂતોના બેંક ખાતામાં કુલ રૂ. ૧૪૪ કરોડથી વધુ જમા કરી દેવામાં આવ્યા છે.

વધુમાં ઘણી અરજીઓમાં ખેડૂતોની સહી બાકી હોય અથવા સંયુક્ત ખાતેદારોના કિસ્સામાં અન્ય ખાતેદારોને સંમતિ બાકી હોવાનો ધ્યાને આવ્યું છે. આવા ખેડૂતોને તેમની અરજીમાં રહેલ ક્ષતિ સુધારવા અને સાધનિક કાગળો જે તે વીસીઇ/ગ્રામસેવક કે તલાટી કમ મંત્રીને વહેલી તકે પહોંચાડવા અનુરોધ કરવામાં આવ્યો છે, જેથી સહાય ચૂકવવામાં વિલંબ ન થાય. વધુ માહિતી માટે ખેડૂતો પોતાના વિસ્તારના ગ્રામ સેવક/તલાટી કમ મંત્રી તથા વિસ્તરણ અધિકારીનો સંપર્ક કરી શકે છે.

જિલ્લા ખેતીવાડી અધિકારીએ તમામ ખેડુતોને વિનંતી કરી છે કે, જે ખેડૂતોને કૃષિ રાહત પેકેજ અંતર્ગત સહાય મેળવવા અરજી કરવાની બાકી છે તે ઝડપથી સંબંધિત ગામના વીસીઈ અથવા ગ્રામસેવકનો સંપર્ક કરી અરજી કરી નાખે તથા જે ખેડૂતોની અરજીઓમાં કાગળો બાકી છે તેઓ વહેલી તકે પૂર્ણ કરી દે. ઘણી અરજીઓમાં ખેડૂતની સહી કે સંયુક્ત ખાતેદારોની સંમતિ ગેરહાજર જોવા મળી છે. આવી બધી અરજીઓમાં ખામીઓ દૂર કરી જરૂરી આધાર પુરાવા ગ્રામસેવક અથવા તલાટી કમ મંત્રી પાસે તુરંત જમા કરવા જણાવ્યું છે. આમ કરવાથી સહાયની ચુકવણીમાં વિલંબ ટળશે અને ખેડૂતોને ઝડપથી નાણાકીય રાહત મળી શકશે.

મોરબી જિલ્લામાં રોડ રસ્તાના નવીનીકરણની કામગીરી અન્વયે માર્ગ અને મકાન વિભાગ (પંચાયત) દ્વારા વાંકાનેરી તાલુકામાં દિઘલીયા- શેખરડીના ૩.૫ કિલોમીટર ગ્રામ્ય માર્ગની અંદાજે રૂ. ૧૨૦ લાખના ખર્ચે રીસર્ફેસિંગની કામગીરી પૂર્ણ કરી વાહન વ્યવહાર પણ પૂર્વવત કરી દેવામાં આવ્યો છે. આ ગ્રામ્ય માર્ગના નવીનીકરણથી ગ્રામ્ય પરિવહન સુરક્ષિત અને સલામતી સાથે સુલભ બન્યું છે.

કાર્યરત માર્ગોની આવરદા પૂર્ણ થતા રોડ રસ્તા નવીનીકરણની કામગીરી કરવામાં આવે છે, જે અંતર્ગત મોરબીમાં વાંકાનેર તાલુકાના ગામડાઓને જોડતા આ ગ્રામ્ય માર્ગની રીસર્ફેસિંગ કામગીરી હાથ ધરવામાં આવી હતી. આ કામગીરીમાં જુના નુકસાનગ્રસ્ત રોડની રીસર્ફેસિંગની કામગીરી હાથ ધરી માર્ગનું નવીનીકરણ કરવામાં આવ્યું છે. આ કામગીરી પૂર્ણ થતા લોકોની પરિવહન સુવિધામાં વધારો થયો છે.

મોરબીમાં મણિમંદિર પાસે ગેરકાયદેસર ધાર્મિક બાંધકામ હટાવતાં તંગદિલીનું વાતાવરણ સર્જાયું છે, પોલીસની સમજાવટથી ટોળા છૂટા પડ્યા છે, ગુજરાત હાઈકોર્ટના આદેશથી કાર્યવાહી કરાઈ છે

શહેરમાં ગેરકાયદેસર ધાર્મિક દબાણ હટાવવા માટે હાથ ધરાયેલી તંત્રની કામગીરી દરમિયાન હાલ તંગદિલી ભર્યું વાતાવરણ સર્જાયું છે. ગુજરાત હાઈકોર્ટના આદેશ બાદ મોરબી શહેરના પ્રખ્યાત હેરિટેજ સ્થળ મણિમંદિર પાસે આવેલું ગેરકાયદેસર બાંધકામ દૂર કરવા 10 JCBની મદદથી ચૂસ્ત પોલીસ બંદોબસ્ત વચ્ચે ડિમોલેશનની પ્રક્રિયા હાથ ધરાઈ હતી, દરમિયાન મણિમંદિર પાસે સ્થિત ધાર્મિક બાંધકામ પર આજે મંગળવારે બુલડોઝર ફરી વળ્યા છે. માત્ર અઢી કલાકની કામગીરીમાં આ આખું ધાર્મિક બાંધકામ જમીનદોસ્ત કરી દેવામાં આવ્યું છે. ત્યારે કાર્યવાહીમાં મોટી સંખ્યામાં લોકો એકઠા થયા હતા, જેના કારણે તંગદિલીનું વાતાવરણ સર્જાયું છે.

વિગતવાર વાત કરીએ તો, મોરબી શહેરમાં પ્રખ્યાત હેરિટેજ સ્થળ મણિમંદિર પાસે આવેલું ગેરકાયદેસર બાંધકામ દૂર કરવા ગુજરાત હાઈકોર્ટે આદેશ આપ્યો હતો. જેને અનુસરતા મોરબી મહાનગરપાલિકા અને જિલ્લા વહીવટી તંત્રએ આજે અહીં મણિમંદિર પાસેના વિસ્તારમાં મેગા ડિમોલેશન માટે સંયુક્ત ઓપરેશન હાથ ધર્યું હતું. ત્યારે અહીં સ્થિત વર્ષો જૂના ધાર્મિક બાંધકામ પર આજે મંગળવારે બુલડોઝર ફરી વળતા શહેરમાં તંગદિલી સર્જાઈ છે.

ગુજરાત હાઈકોર્ટના આદેશ બાદ સ્થાનિક વહીવટી તંત્રએ આ કામગીરી હાથ ધરી હતી, જે માટે 10થી વધુ જેસીબી મશીન, 2 હિટાચી અને 10થી વધુ ડમ્પરોની મદદ લેવામાં આવી હતી, સાથે જ ડિમોલેશનની કામગીરી દરમિયાન કોઈ અનિચ્છનીય બનાવ ન બને તે માટે શહેરમાં અભૂતપૂર્વ પોલીસ બંદોબસ્ત ગોઠવવામાં આવ્યો હતો, ત્યારે ડિમોલેશનની કામગીરી દરમિયાન વર્ષો જૂના આ ધાર્મિક બાંધકામને તોડી પડાયું છે, જેના કારણે મોટી સંખ્યામાં સ્થાનિક લોકોના ટોળે ટોળા એકઠા થયા હતા, જોકે પોલીસે પરિસ્થિતિ પર કાબૂ રાખવા પહેલેથી જ ચૂસ્ત બંદોબસ્ત ગોઠવેલો છે.

મોરબી શહેરના મણિમંદિર વિસ્તારમાં ચાલી રહેલી આ ડિમોલેશનની કામગીરી માટે રાજકોટ અને જામનગરથી પણ પોલીસ દળને બોલાવવામાં આવી છે. આટલું જ નહીં 50થી વધુ ઉચ્ચ પોલીસ અધિકારીઓ અને લગભગ 1000 જેટલા પોલીસ જવાનોનો ચૂસ્ત કાફલો ઘટનાસ્થળે તૈનાત કરી આ કાર્યવાહી હાથ ધરાઈ છે, સાથે જ કોઈ અનિચ્છનીય બનાવ ન બને તે માટે ડ્રોન કેમેરા દ્વારા પણ સતત ચાંપતી નજર રાખવામાં આવી રહી છે.