મોરબી, 27 સપ્ટેમ્બર 2026: લાયન્સ ક્લબ ઓફ મોરબી નઝરબાગ અને કોમનમેન ફાઉન્ડેશનના સંયુક્ત ઉપક્રમે મોરબીમાં મહારક્તદાન કેમ્પનું આયોજન કરવામાં આવ્યું હતું. લાયન્સ ક્લબના ચાર્ટર્ડ મેમ્બર તથા મોરબીના સિનિયર ચાર્ટર્ડ એકાઉન્ટન્ટ સ્વ. હિંમતલાલ કેશવજીભાઈ પંડિતની સ્મૃતિને અર્પણ કરવામાં આવેલા આ રક્તદાન કેમ્પમાં સેવાભાવી નાગરિકોએ ઉત્સાહપૂર્વક રક્તદાન કર્યું હતું.
જીઆઈડીસી મેઈન રોડ પર આવેલી સંસ્કાર બ્લડ બેન્ક ખાતે સવારે 8થી બપોરે 1 વાગ્યા સુધી યોજાયેલા આ કેમ્પમાં અંદાજે 50 બોટલ રક્ત એકત્રિત કરવામાં આવ્યું હતું. રક્તદાન દ્વારા જરૂરિયાતમંદ દર્દીઓને સમયસર રક્ત ઉપલબ્ધ કરાવવાના હેતુથી યોજાયેલા આ સેવાકીય કાર્યક્રમમાં વિવિધ ક્ષેત્રના લોકો જોડાયા હતા.
લાયન્સ ક્લબ ઓફ મોરબી નઝરબાગ અને કોમનમેન ફાઉન્ડેશન દ્વારા વર્ષ દરમિયાન વિવિધ સામાજિક અને સેવાકીય પ્રવૃત્તિઓ કરવામાં આવે છે. આ મહારક્તદાન કેમ્પ પણ તેમની સતત સેવાભાવનાની પ્રવૃત્તિનો એક ભાગ રહ્યો હતો.
કેમ્પના આયોજનને સફળ બનાવવા લાયન્સ ક્લબ નઝરબાગના પ્રમુખ સચિન કોટેચા, સેક્રેટરી અલ્પેશ પુજારા, પ્રોજેક્ટ ચેરમેન ડો. રવીન્દ્ર ભટ્ટ, વિક્રમ દફ્તરી સહિતની ટીમે આયોજન અને વ્યવસ્થામાં મહત્વપૂર્ણ જહેમત ઉઠાવી હતી.
