નવી દિલ્હી: દેશના અનેક ભાગોમાં ચોમાસું ફરી સક્રિય બન્યું છે. બંગાળની ખાડીમાં સર્જાયેલા લો-પ્રેશર સિસ્ટમની અસર હવે પૂર્વ, મધ્ય અને ઉત્તર ભારત સુધી જોવા મળી રહી છે. આ પરિસ્થિતિને ધ્યાનમાં રાખીને ભારતીય હવામાન વિભાગ (IMD)એ 18 જુલાઈ માટે દેશના 17 રાજ્યોમાં ભારે વરસાદ, વાવાઝોડા જેવા પવન અને વીજળી પડવાની ચેતવણી જાહેર કરી છે.
હવામાન વિભાગના જણાવ્યા અનુસાર અનેક વિસ્તારોમાં 40થી 60 કિમી પ્રતિ કલાકની ઝડપે પવન ફૂંકાઈ શકે છે તેમજ ગાજવીજ સાથે વીજળી પડવાની શક્યતા છે. હવામાન નિષ્ણાતોનું માનવું છે કે જુલાઈના અંત સુધીમાં ચોમાસું વધુ મજબૂત બનશે અને વરસાદની ઘટ ઘણી હદ સુધી પૂરી થઈ શકે છે.
જુલાઈમાં વરસાદની ખાધ હવે ઘટી શકે
આ વર્ષે જુલાઈના મધ્ય સુધી દેશના ઘણા વિસ્તારોમાં સામાન્ય કરતાં ઓછો વરસાદ નોંધાયો હતો. ખાનગી હવામાન એજન્સી સ્કાયમેટના જણાવ્યા મુજબ દેશભરમાં વરસાદની ખાધ લગભગ 24 ટકા સુધી પહોંચી હતી. જોકે હવે હવામાનમાં ઝડપથી ફેરફાર થઈ રહ્યો છે અને જુલાઈના છેલ્લા સપ્તાહમાં મધ્ય અને ઉત્તર ભારતમાં સારો વરસાદ થવાની શક્યતા વ્યક્ત કરવામાં આવી છે.
IMD અનુસાર છત્તીસગઢના કેટલાક વિસ્તારોમાં અતિભારે વરસાદ પડી શકે છે. ઓડિશામાં આગામી ત્રણ દિવસ સુધી ભારે વરસાદની આગાહી કરવામાં આવી છે.
આ ઉપરાંત બિહાર, ઝારખંડ, ઉત્તર પ્રદેશ, ઉત્તરાખંડ, હિમાચલ પ્રદેશ, જમ્મુ-કાશ્મીર, ગુજરાત, મધ્ય પ્રદેશ, રાજસ્થાન, સિક્કિમ, પશ્ચિમ બંગાળ, કેરળ, મણિપુર, ત્રિપુરા તેમજ પૂર્વોત્તર ભારતના અનેક વિસ્તારોમાં પણ ભારે વરસાદ, ગાજવીજ અને તેજ પવનનું એલર્ટ જાહેર કરવામાં આવ્યું છે.
રાષ્ટ્રીય રાજધાની દિલ્હીમાં શનિવારે આખો દિવસ વાદળછાયું વાતાવરણ રહેવાની શક્યતા છે. બપોર બાદ અથવા સાંજના સમયે હળવા વરસાદની સંભાવના છે. IMDએ શનિવાર અને રવિવાર માટે યેલો એલર્ટ જાહેર કર્યું છે.
વરસાદ બાદ ભેજમાં થોડો ઘટાડો થઈ શકે છે, જોકે મહત્તમ તાપમાન 36 ડિગ્રી સેલ્સિયસની આસપાસ રહેવાની શક્યતા છે. પવનની ઝડપ 20થી 30 કિમી પ્રતિ કલાક સુધી પહોંચી શકે છે.
ઉત્તર પ્રદેશમાં આગામી દિવસોમાં ભારે વરસાદ
ઉત્તર પ્રદેશમાં ચોમાસું સંપૂર્ણ રીતે સક્રિય બન્યું છે. 18 જુલાઈએ વારાણસી, ગાઝીપુર, જૌનપુર, ગોરખપુર, પ્રયાગરાજ અને મિર્ઝાપુર સહિત બે ડઝનથી વધુ જિલ્લાઓમાં ભારે વરસાદની આગાહી કરવામાં આવી છે.
જ્યારે 19થી 23 જુલાઈ દરમિયાન પશ્ચિમ ઉત્તર પ્રદેશના મેરઠ, ગાઝિયાબાદ, નોઈડા, અલીગઢ અને આગ્રા સહિતના વિસ્તારોમાં પણ ભારે વરસાદ થઈ શકે છે. આ દરમિયાન કેટલાક વિસ્તારોમાં 50 કિમી પ્રતિ કલાકની ઝડપે પવન ફૂંકાવાની પણ શક્યતા છે.
ઓડિશા અને બિહારમાં ખાસ ચેતવણી
બંગાળની ખાડીમાં સર્જાયેલા લો-પ્રેશરની સૌથી વધુ અસર ઓડિશામાં જોવા મળી રહી છે. IMDના જણાવ્યા મુજબ આગામી કેટલાક દિવસો સુધી રાજ્યના અનેક જિલ્લાઓમાં ભારે વરસાદ ચાલુ રહી શકે છે.
બીજી તરફ બિહારમાં 18થી 23 જુલાઈ દરમિયાન વ્યાપક વરસાદની આગાહી કરવામાં આવી છે. ખાસ કરીને 19 અને 20 જુલાઈએ કેટલાક વિસ્તારોમાં ભારેથી અતિભારે વરસાદ પડી શકે છે. વીજળી પડવાની સંભાવનાને ધ્યાનમાં રાખીને લોકોને ખુલ્લા મેદાનમાં ન જવાની સલાહ આપવામાં આવી છે.
