૪૮ કલાકમાં યોગ્ય નિર્ણય નહીં આવે તો સરપંચ-ઉપસરપંચ સહિત તમામ સભ્યો આપશે રાજીનામું
મોરબી, તા. ૨૬ જૂન: મોરબી જિલ્લાના જેતપર ગામે વિવિધ માંગણીઓને લઈને ચાલી રહેલા ખેડૂતોના આંદોલનને ટંકારા તાલુકાના આંદરણા ગામે ખુલ્લું સમર્થન જાહેર કર્યું છે. આંદરણા ગ્રામ પંચાયતે ખેડૂતોની માંગણીઓ ન્યાયસંગત હોવાનું જણાવી સરકારને તાત્કાલિક હકારાત્મક નિર્ણય લેવા અપીલ કરી છે.
ગ્રામ પંચાયત દ્વારા સર્વાનુમતે પસાર કરાયેલા ઠરાવ મુજબ જો આગામી ૪૮ કલાકમાં ખેડૂતોના પ્રશ્નોનો યોગ્ય ઉકેલ નહીં આવે તો સરપંચ, ઉપસરપંચ તેમજ ગ્રામ પંચાયતના તમામ ચૂંટાયેલા સભ્યો પોતાના હોદ્દા પરથી સામૂહિક રાજીનામું આપશે. ગ્રામ પંચાયતે જણાવ્યું છે કે ખેડૂતો લાંબા સમયથી પોતાના હક્ક અને ન્યાય માટે આંદોલન કરી રહ્યા છે, છતાં સરકાર તરફથી હજુ સુધી કોઈ સંતોષકારક નિર્ણય લેવાયો નથી.
આંદરણા ગામના આગેવાનો અને ગ્રામજનોએ પણ ખેડૂતોના આંદોલનને નૈતિક અને જાહેર સમર્થન આપવાની પ્રતિબદ્ધતા વ્યક્ત કરી હતી. ગ્રામ પંચાયતના આ નિર્ણયથી ખેડૂતોના આંદોલનને વધુ બળ મળવાની શક્યતા વ્યક્ત થઈ રહી છે. પંચાયતે સરકારને ખેડૂતોના પ્રશ્નોનું તાત્કાલિક નિરાકરણ લાવી પરિસ્થિતિ વધુ ગંભીર બને તે પહેલાં યોગ્ય નિર્ણય લેવા અનુરોધ કર્યો છે.
આ સાથે ગ્રામજનોને પણ આંદોલન પ્રત્યે એકતા દર્શાવવા અને ખેડૂતોના ન્યાયસંગત પ્રશ્નોના ઉકેલ માટે અવાજ ઉઠાવવા અપીલ કરવામાં આવી છે. ગ્રામ પંચાયતે ચેતવણી આપી છે કે જો ખેડૂતોની માંગણીઓની અવગણના થશે તો વર્ષ ૨૦૨૭ની વિધાનસભાની ચૂંટણીમાં જવાબદાર પ્રતિનિધિઓનો લોકશાહી ઢબે વિરોધ કરવામાં આવશે.
આંદરણા ગ્રામ પંચાયતના આ ઠરાવને ખેડૂતોના આંદોલન માટે મહત્વપૂર્ણ સમર્થન તરીકે જોવામાં આવી રહ્યો છે અને ગ્રામ્ય વિસ્તારમાં ખેડૂતો પ્રત્યે વધતા જનસમર્થનનો આ નિર્ણય મહત્વનો પુરાવો માનવામાં આવે છે.
