વિશ્વના ખૂણે ખૂણે પહોંચેલો પ્રબુદ્ધતાનો પ્રકાશ : અસંખ્ય હૈયા, એક જ ભાવ ‘અહો ગુરુદેવ’

પૂજ્ય ગુરૂદેવશ્રી રાકેશજીની ૬૦મી જન્મજયંતિ નિમિત્તે ૬૦ આધ્યાત્મિક અને સેવાલક્ષી વિશ્વવ્યાપી પ્રકલ્પોની જાહેરાત

મુંબઈ, ૨૬ સપ્ટેમ્બર ૨૦૨૬: પૂજ્ય ગુરૂદેવશ્રી રાકેશજીના ૬૦મા પ્રાગટ્ય વર્ષ નિમિત્તે શ્રીમદ્ રાજચંદ્ર મિશન ધરમપુર દ્વારા મુંબઈના જીઓ વર્લ્ડ કન્વેન્શન સેન્ટર ખાતે ૨૫ અને ૨૬ સપ્ટેમ્બરના રોજ ‘Aho Gurudev – 60 Years of an Enlightened Existence’ નામે ભવ્ય ઉજવણીનું આયોજન કરવામાં આવ્યું હતું. આ પ્રસંગે ૨૪થી વધુ દેશોના ૨૧૪ શહેરોમાંથી હજારો ગુરુપ્રેમીઓ તથા મહાનુભાવો ઉપસ્થિત રહ્યા હતા.

બાળપણથી જ ગહન ધ્યાન અને આત્મજ્ઞાનની સાધનામાં રત રહેલા પૂજ્ય ગુરૂદેવશ્રી રાકેશજીની આધ્યાત્મિક યાત્રા છેલ્લા છ દાયકામાં વિશ્વના વિવિધ દેશો અને ખંડો સુધી વિસ્તરી છે. તેમના સત્સંગ અને માર્ગદર્શનથી પ્રેરાઈ અનેક લોકો આત્મજાગૃતિ, આધ્યાત્મિક વિકાસ તથા માનવસેવાના કાર્યો સાથે જોડાઈ રહ્યા છે.

શ્રીમદ્ રાજચંદ્રજીની પ્રેરણાથી ઘડાયેલી પૂજ્ય ગુરૂદેવશ્રીની આધ્યાત્મિક દૃષ્ટિ આજે વિવિધ ક્ષેત્રોમાં સેવારૂપે સાકાર થઈ રહી છે. શિક્ષણ, આરોગ્ય, પ્રાણી સેવા, મહિલા સશક્તિકરણ, યુવા વિકાસ, પર્યાવરણ સંરક્ષણ અને સમાજસેવા સહિતના ક્ષેત્રોમાં વિવિધ પહેલો હાથ ધરવામાં આવી છે.

૨૫ સપ્ટેમ્બરના રોજ પૂજ્ય ગુરૂદેવશ્રી રાકેશજીના જીવનના આધ્યાત્મિક અને સેવાલક્ષી બંને આયામોને પ્રતિબિંબિત કરતાં કુલ ૬૦ નવા કલ્યાણકારી પ્રકલ્પોની જાહેરાત કરવામાં આવી હતી. તેમાં ૩૦ આધ્યાત્મિક અને ૩૦ સેવાલક્ષી પ્રકલ્પોનો સમાવેશ થાય છે.

સેવાકીય પહેલોમાં શ્રીમદ્ રાજચંદ્ર સર્વમંગલ કેન્સર હોસ્પિટલ, સુરેન્‍દ્રનગર ખાતે શ્રીમદ્ રાજચંદ્ર સર્વમંગલ હોસ્પિટલ અને મેડિકલ કૉલેજ, શ્રીમદ્ રાજચંદ્ર મેન્ટલ હેલ્થ ઇનિશિયેટિવ તથા ૬૦ નવા શ્રીમદ્ રાજચંદ્ર લવ એન્ડ કેર સેન્ટર્સનો સમાવેશ થાય છે. સમગ્ર ભારતમાં ૬ કરોડ લોકો સુધી પહોંચવાના લક્ષ્ય સાથે મલ્ટિ-સ્પેશિયાલિટી મેગા મેડિકલ કેમ્પ્સ ઉપરાંત એનિમિયા અને વિઝન કેર કેમ્પ્સનું આયોજન પણ કરવામાં આવશે.

ધરમપુરમાં પ્રાણી સેવા માટેના વિશાળ કેમ્પસ અંતર્ગત શ્રીમદ્ રાજચંદ્ર એનિમલ હોસ્પિટલ, એનિમલ શેલ્ટર, ઇન્સ્ટિટ્યૂટ ઑફ વેટરિનરી સાયન્સ અને અહિંસા અવેરનેસ સેન્ટર એમ ચાર સંસ્થાઓ વિકસાવવામાં આવશે. મલાડમાં પણ એનિમલ હોસ્પિટલ શરૂ કરવાની જાહેરાત કરવામાં આવી છે.

શિક્ષણ અને યુવા સશક્તિકરણ ક્ષેત્રે શ્રીમદ્ રાજચંદ્ર દિશા નામનું મફત AI આધારિત કારકિર્દી માર્ગદર્શન પ્લેટફોર્મ, મુંબઈમાં શ્રીમદ્ રાજચંદ્ર સ્કૂલ ફોર સ્પેશિયલ નીડ્સ ચિલ્ડ્રન તથા ગ્રામીણ ભારત માટે શ્રીમદ્ રાજચંદ્ર સર્વમંગલ યુનિવર્સિટીની પરિકલ્પના કરવામાં આવી છે. આ સાથે શ્રીમદ્ રાજચંદ્ર વનીકરણ પહેલ, મહિલા સશક્તિકરણ, સમાજ વિકાસ અને પર્યાવરણ સંરક્ષણ માટે પણ વિવિધ અભિયાનો હાથ ધરવામાં આવશે.

આધ્યાત્મિક ક્ષેત્રે મુંબઈમાં નવા આધ્યાત્મિક કેન્દ્રો ઉપરાંત શ્રીમદ્ રાજચંદ્ર આશ્રમ, ધરમપુર ખાતે શ્રીમદ્ રાજચંદ્ર વેલનેસ સેન્ટર, એકાંત કુટિરો અને શ્રીમદ્ રાજચંદ્ર મ્યુઝિયમ જેવી સુવિધાઓ વિકસાવવામાં આવશે. દક્ષિણ અમેરિકામાં છ નવા સત્સંગ કેન્દ્રો શરૂ કરવામાં આવશે.

પૂજ્ય ગુરૂદેવશ્રીના પ્રવચનો, પુસ્તકો અને ધ્યાનસાધનાને વિશ્વની આઠ સૌથી વધુ બોલાતી ભાષાઓમાં પહોંચાડવાની યોજના પણ જાહેર કરવામાં આવી છે. ૧૦ ભાષાઓમાં છ-છ શીર્ષકો સાથે કુલ ૬૦ પુસ્તકો ઉપલબ્ધ કરાવવામાં આવશે. શ્રીમદ્ રાજચંદ્રજીના ‘આત્મસિદ્ધિ શાસ્ત્ર’ પર પૂજ્ય ગુરૂદેવશ્રી રાકેશજી દ્વારા કરવામાં આવેલી ટીકાને ૬૦ ભાષાઓમાં ઉપલબ્ધ કરાવવામાં આવશે. સાથે જ ‘શ્રી આત્મસિદ્ધિ શાસ્ત્ર’નું ૬૦ ભાષાઓમાં રૂપાંતર તથા પૂજ્ય ગુરૂદેવશ્રીના જીવન પર આધારિત ‘BEYOND’ નામના દૃશ્ય જીવનચરિત્રનું અનાવરણ કરવામાં આવ્યું.

૨૬ સપ્ટેમ્બરની સવાર વૈરાગ્યના ભાવથી ઓતપ્રોત રહી હતી. આ પ્રસંગે ૧૧ ઉચ્ચ શિક્ષિત અને કારકિર્દી ધરાવતા યુવાઓએ પૂજ્ય ગુરૂદેવશ્રી રાકેશજીના ચરણોમાં આત્માર્પિત દીક્ષા ગ્રહણ કરી હતી.

૨૬ સપ્ટેમ્બરની સાંજે ‘Aho Gurudev’ નામની ભવ્ય સાંસ્કૃતિક પ્રસ્તુતિ યોજાઈ હતી. મિશનના ૬૦૦થી વધુ સમર્પિત યુવા ભક્તોએ સંગીત, નૃત્ય, અભિનય અને દૃશ્યાવલિ દ્વારા પૂજ્ય ગુરૂદેવશ્રી રાકેશજીના જીવન અને કાર્યની ગાથાને મંચ પર રજૂ કરી હતી. ઉજવણી દરમિયાન પૂજ્ય ગુરૂદેવશ્રીના ત્રણ પ્રેરણાદાયી પ્રવચનો પણ યોજાયા હતા.

આ પ્રસંગે પૂજ્ય મોરારી બાપુ, પૂજ્ય આનંદમૂર્તિ ગુરુમા, સ્વામી ચિદાનંદ સરસ્વતીજી, સ્વામી સ્વરૂપાનંદજી, બી.કે. સિસ્ટર શિવાની, સાધ્વી ભગવતી સરસ્વતીજી અને પૂજ્ય ભિખુ સંઘસેનાજી સહિત અનેક સંતોની ઉપસ્થિતિ રહી હતી.

ઉજવણીમાં મહારાષ્ટ્ર સરકારના કેબિનેટ મંત્રી મંગલ પ્રભાત લોઢા, ઇન્ફોસિસના સ્થાપક અને ચેરમેન એમેરિટસ પદ્મવિભૂષણ એન. આર. નારાયણ મૂર્તિ, ટાટા સન્સના ચેરમેન પદ્મભૂષણ એન. ચંદ્રશેખરન, પદ્મશ્રી હેમા માલિની, પદ્મભૂષણ દીપક પારેખ, પદ્મશ્રી દિલીપ સાંઘવી, પદ્મશ્રી સંજીવ કપૂર, મનોજ મોદી, વિનોદ અદાણી, અશોક હિન્દુજા, રણબીર કપૂર, સુધીર મહેતા, સોનમ કપૂર આહુજા, નિલેશ શાહ, મોતીલાલ ઓસવાલ તથા મધુકર પારેખ સહિત વિવિધ ક્ષેત્રોના મહાનુભાવો ઉપસ્થિત રહ્યા હતા.

મુંબઈથી શરૂ થયેલી આ ઉજવણી આગામી સમયમાં સમગ્ર ભારતમાં તથા વિદેશોમાં પણ આગળ વધશે. દુબઈ, લંડન, ટોરોન્ટો અને અમેરિકાના વિવિધ શહેરોમાં પણ આ ઉજવણીના કાર્યક્રમો યોજાશે.

આમ, પૂજ્ય ગુરૂદેવશ્રી રાકેશજીની ૬૦મી જન્મજયંતિ નિમિત્તે યોજાયેલી આ ઉજવણી આધ્યાત્મિક જાગૃતિ, સેવા અને માનવકલ્યાણના વિવિધ આયામોને ઉજાગર કરતી રહી. છ દાયકાની આધ્યાત્મિક અને સેવાયાત્રાને આગળ ધપાવતાં ૬૦ નવા વૈશ્વિક પ્રકલ્પોની જાહેરાત સાથે આ પ્રસંગે આધ્યાત્મિકતા અને માનવસેવાના સંકલ્પને વધુ વ્યાપક બનાવવાનો સંદેશ આપવામાં આવ્યો.