08 ઓક્ટોબર 2026: મોરબી મહાનગરપાલિકાની સ્ટેન્ડિંગ કમિટીની મળેલી બેઠકમાં શહેરના નાગરિકોને લગતા વિવિધ મહત્વના મુદ્દાઓ પર ચર્ચા કરી નિર્ણયો લેવામાં આવ્યા હતા. બેઠકમાં કચરા સેવા માટેના નવા ચાર્જ અમલમાં મૂકવા અંગેની દરખાસ્તને મંજૂરી આપવામાં આવી હતી. રહેણાંક મિલકતો માટે કચરા સેવાની જોગવાઈ સાથે મિલકતવેરામાં પડતી મુશ્કેલીઓના નિવારણ માટે પણ જરૂરી પગલાં અંગે ચર્ચા કરવામાં આવી હતી.
સ્ટેન્ડિંગ કમિટીના ચેરમેન જયંતિભાઈ પડસુંબિયા જણાવ્યું હતું કે મહાનગરપાલિકાની હદમાં આવતા ઔદ્યોગિક અને કોમર્શિયલ એકમો માટે 8 કલાક સુધીના ફિક્સ ચાર્જ તરીકે રૂ. 2,500 વસૂલવામાં આવશે. જ્યારે દુકાન બહારના વિસ્તારો માટે મિનિમમ ફિક્સ ચાર્જ રૂ. 5,000 રહેશે. 8 કલાકથી વધુ સમય માટે પ્રતિ કલાક રૂ. 500 તથા પ્રતિ કિલોમીટર રૂ. 50 લેખે ચાર્જ વસૂલવાની દરખાસ્ત કરવામાં આવી છે.
મહાનગરપાલિકા હદમાં રહેણાંક મિલકતો માટે કચરા સેવાના કોઈ ચાર્જ નહીં લેવાની જોગવાઈ પણ કરવામાં આવી છે. મિલકતધારકોની સમસ્યાઓના ઝડપી ઉકેલ માટે રેકોર્ડ પર ઉપલબ્ધ મિલકતની સાધન ચકાસણી હાથ ધરવામાં આવશે. યોગ્ય તપાસ બાદ કચરા સેવાની નોંધણી કરવામાં આવશે અને ભવિષ્યમાં મિલકત અંગેના વિવાદો તથા નાગરિકોની મુશ્કેલીઓમાં ઘટાડો થાય તે દિશામાં કામગીરી કરવામાં આવશે.
બેઠક દરમિયાન કોર્પોરેશન બિલ્ડિંગના નિર્માણ કાર્ય અંગે પણ ચર્ચા કરવામાં આવી હતી. ચેરમેન જયંતિભાઈ પડકુણિયાના જણાવ્યા મુજબ, સમય જતાં જૂના ભાવોમાં થયેલા ફેરફાર તથા એજન્સીમાં બદલાવના કારણે વિવિધ માળખાકીય કામોના ખર્ચમાં વધારો થયો છે. જેના અનુસંધાને રૂ. 1.20 કરોડ, રૂ. 85 લાખ અને રૂ. 35 લાખ જેટલા વધારાના ખર્ચના એસેસમેન્ટ રજૂ કરવામાં આવ્યા હતા.
હાલમાં આ વધારાની રકમ ચૂકવવા માટે સરકાર તરફથી કોઈ ગેરંટી ફાળવવામાં આવી નથી અને સ્વભંડોળમાંથી પણ આટલી મોટી રકમ ચૂકવવી જરૂરી હોવાથી વધારાના ખર્ચના મુદ્દે હાલ પૂરતો પેન્ડિંગ રાખવાનો નિર્ણય સ્ટેન્ડિંગ કમિટીની બેઠકમાં લેવામાં આવ્યો છે.
