રવાપર ચોકડી ખાતે વિજય સરઘસ નીકળ્યું, આંતરરાષ્ટ્રીય સિદ્ધિથી મોરબીનું નામ ગૌરવભેર રોશન કર્યું
તા. ૦૨/૧૧/૨૦૨૬: મોરબીની દીકરી સભઇ ગઢવીએ આંતરરાષ્ટ્રીય કબડ્ડી સ્પર્ધામાં સુવર્ણ ચંદ્રક પ્રાપ્ત કરીને સમગ્ર મોરબી શહેર અને ગુજરાતનું ગૌરવ વધાર્યું છે. ‘1st Commonwealth Kabaddi Championship 2026’માં ભારતીય મહિલા કબડ્ડી ટીમનું પ્રતિનિધિત્વ કરીને ગોલ્ડ મેડલ હાંસલ કરનાર સભઇ ગઢવીના સન્માનમાં મોરબીના રવાપર ચોકડી ખાતે ભવ્ય વિજય સરઘસનું આયોજન કરવામાં આવ્યું હતું.
ગુજરાતની કબડ્ડી રમતની પ્રથમ મહિલા ખેલાડી તરીકે આંતરરાષ્ટ્રીય સ્પર્ધામાં ભારતીય મહિલા ટીમનું પ્રતિનિધિત્વ કરવાની ઐતિહાસિક સિદ્ધિ સભઇ ગઢવીએ મેળવી છે. તેમની આ સફળતા પાછળ વર્ષોની મહેનત, રમત પ્રત્યેની લગન, શિસ્ત અને અડગ સંકલ્પ રહેલો છે.
રવાપર ચોકડી ખાતે નીકળેલા વિજય સરઘસ દરમિયાન મોરબીવાસીઓએ પોતાની દીકરીની ઐતિહાસિક સિદ્ધિની ખુશી વ્યક્ત કરી હતી. આંતરરાષ્ટ્રીય સ્તરે સુવર્ણ ચંદ્રક મેળવી મોરબીનું નામ રોશન કરનાર સભઇ ગઢવીનું આ ગૌરવપૂર્ણ સન્માન શહેર માટે યાદગાર ક્ષણ બની રહ્યું છે.
સભઇ ગઢવીની આ સિદ્ધિ મોરબીની યુવા પેઢી, ખાસ કરીને મહિલા ખેલાડીઓ માટે પ્રેરણારૂપ બની છે. તેમની સફળતા સાબિત કરે છે કે યોગ્ય મહેનત, સમર્પણ અને આત્મવિશ્વાસથી આંતરરાષ્ટ્રીય સ્તરે પણ સફળતા મેળવી શકાય છે. મોરબીની દીકરીની આ સિદ્ધિ સમગ્ર ગુજરાત માટે ગૌરવની બાબત બની છે.
