મોરબી: શહેરના મહેન્દ્રનગર ચોકડી ખાતે વાહનવ્યવહારની સમસ્યાને હળવી બનાવવા માટે રૂ. 56 કરોડના અંદાજિત ખર્ચે નિર્માણ પામી રહેલા 750 મીટર લાંબા ફ્લાયઓવર બ્રિજની કામગીરી પૂરજોશમાં ચાલી રહી છે. તંત્રના દાવા મુજબ આ મહત્વપૂર્ણ પ્રોજેક્ટ માર્ચ 2027 સુધીમાં પૂર્ણ થવાની સંભાવના છે.
મોરબીના ઔદ્યોગિક અને વેપારી ક્ષેત્રના સતત વિકાસને કારણે મહેન્દ્રનગર ચોકડી પર ભારે વાહનોની અવરજવર વધી રહી છે. હળવદ રોડ, મોરબી-જેતપર રોડ તેમજ વાંકાનેર-માળિયા નેશનલ હાઈવે સાથે જોડાયેલા આ માર્ગ પર વારંવાર ટ્રાફિક જામની સ્થિતિ સર્જાતી હોય છે. આ સમસ્યાના કાયમી ઉકેલના ભાગરૂપે ફ્લાયઓવર બ્રિજનું નિર્માણ હાથ ધરવામાં આવ્યું છે.
આ ફ્લાયઓવર હળવદ તરફથી આવતા વાહનોને નેશનલ હાઈવે તરફ સીધો માર્ગ પૂરો પાડશે, જેના પરિણામે મહેન્દ્રનગર ચોકડી પર ટ્રાફિકનું દબાણ નોંધપાત્ર રીતે ઘટવાની અપેક્ષા છે. બ્રિજ કાર્યરત થયા બાદ વાહનચાલકોને ચાર રસ્તા પર લાંબા સમય સુધી રાહ જોવાની સમસ્યામાંથી રાહત મળશે.
પ્રોજેક્ટ પૂર્ણ થવાથી શહેરના મુખ્ય માર્ગો પર વાહનવ્યવહાર વધુ સુવ્યવસ્થિત બનશે, મુસાફરીનો સમય ઘટશે અને ટ્રાફિકને કારણે સર્જાતી અકસ્માતોની સંભાવનામાં પણ ઘટાડો થશે. મોરબીના ઔદ્યોગિક વિકાસને અનુરૂપ માળખાકીય સુવિધાઓના વિસ્તરણમાં આ ફ્લાયઓવર બ્રિજ મહત્વપૂર્ણ સાબિત થશે.
