મોરબીથી ત્રણેક કિમી દૂર અમરેલી ગામમાં જેલ માટે ૩૨ એકર જમીનની ફાળવણી જિલ્લા કલેકટર દ્વારા કરાઇ
રાજ્ય સરકાર દ્વારા મોરબીમાં આધુનિક સુવિધાઓથી યુક્ત જિલ્લાકક્ષાની નવી જેલ બનાવવા મહત્વપૂર્ણ નિર્ણય લેવામાં આવ્યો છે. હાલની સબ જેલ જે 1954માં માત્ર 84 કેદી ધરાવતી ક્ષમતા સાથે શરૂ કરાઈ હતી, તેમાં હવે કેદીઓની સંખ્યામાં નોંધપાત્ર વધારો થયો છે. 2017માં તેનું સમર્થન વધારીને 171 (143 પુરૂષ અને 28 મહિલા કેદી) કરવામાં આવ્યું હતું. હવે આગામી 50 વર્ષ માટે કેદીઓની સંખ્યાની આવક-જાવકને ધ્યાને લઈને, નવી જેલ 550 કેદીની ક્ષમતા સાથે નિર્માણ પામશે.
કલેક્ટર કે.બી. ઝવેરી દ્વારા માહિતી આપવામાં આવી હતી કે નવા જેલ માટે મોરબીથી ત્રણ કિમી દૂર આવેલ અમરેલી ગામે સર્વે નં. 199માંથી 5-22-70 હેક્ટર જમીન ફાળવવામાં આવી છે. અહીં જેલની આધુનિક સુવિધાઓ સાથે સાથે કેદીઓ માટે રહેણાક, મનોરંજન, હરવા-ફરવા માટે ખુલ્લી જગ્યા, તાલીમ અને રોજગારલક્ષી ઉદ્યોગો પણ હાથ ધરવામાં આવશે.
જિલ્લા જેલર ડી.એમ. ગોહિલે જણાવ્યુ હતું કે કેદીઓની વધતી જતી સંખ્યાને જોતા છેલ્લા કેટલાય વર્ષથી નવી જેલની માંગણી કરવામાં આવી રહી હતી. આ સંબંધમાં જિલ્લા જેલ કમિટિએ પણ દરખાસ્ત આપી હતી. હવે સરકાર દ્વારા મંજૂરી મળતા, મોરબી માટે આ મોટો વિકાસ બની રહેશે.
નવી જેલમાં 500 પુરૂષ અને 50 મહિલા કેદીઓ માટે જુદી જુદી સુવિધાઓ ઉપલબ્ધ રહેશે. જેલના સ્ટાફ માટે પણ આધુનિક વ્યવસ્થા ઉભી કરવામાં આવશે.
જિલ્લા જેલ કમિટિમાં પ્રિન્સિપલ ડિસ્ટ્રિક્ટ જજ, કલેક્ટર, પોલીસ અધિક્ષક, જિલ્લા કાનૂની સેવા સત્તા મંડળના સચિવ, વરિષ્ઠ મહિલા ન્યાયિક અધિકારી અને જેલ અધિક્ષક સહિતના સભ્યો જોડાયેલા છે.
આ નિર્ણયથી ઓવરક્રાઉડ જેવી સમસ્યાનું નિરાકરણ થશે તેમજ કેદીઓના માનવ અધિકાર અને પુનર્વાસના અભિગમને સાકાર કરતો મહત્વનો પગથિયો સાબિત થશે.
