તા. 12 જુલાઈ: ગુજરાતમાં છેલ્લા કેટલાક દિવસોથી વરસાદી પ્રવૃત્તિમાં નોંધપાત્ર ઘટાડો જોવા મળી રહ્યો છે. એકાદ-બે વિસ્તારોને બાદ કરતાં રાજ્યના મોટાભાગના ભાગોમાં વરસાદી માહોલ નબળો રહ્યો છે. હવામાન વિભાગની આગાહી મુજબ આગામી ત્રણથી ચાર દિવસ સુધી રાજ્યના મોટા ભાગના વિસ્તારોમાં નોંધપાત્ર વરસાદની શક્યતા ઓછી છે, જ્યારે સૌરાષ્ટ્ર અને દક્ષિણ ગુજરાતના કેટલાક વિસ્તારોમાં હળવાથી મધ્યમ વરસાદી ઝાપટાં પડી શકે છે.
12થી 14 જુલાઈ દરમિયાન જૂનાગઢ, ગીર સોમનાથ, અમરેલી, ભાવનગર, ભરૂચ, વડોદરા, છોટા ઉદેપુર, નર્મદા, સુરત, તાપી, ડાંગ, નવસારી અને વલસાડ જિલ્લામાં છૂટાછવાયા સ્થળોએ હળવાથી મધ્યમ વરસાદની સંભાવના વ્યક્ત કરવામાં આવી છે. બીજી તરફ રાજકોટ, અમદાવાદ, ગાંધીનગર, મહેસાણા સહિતના મોટાભાગના જિલ્લાઓમાં આ સમયગાળા દરમિયાન નોંધપાત્ર વરસાદની શક્યતા ઓછી રહેશે.
15 જુલાઈના રોજ પણ વરસાદી પ્રવૃત્તિ મર્યાદિત વિસ્તારોમાં રહેવાની શક્યતા છે. પોરબંદર, રાજકોટ, જૂનાગઢ, અમરેલી, ભાવનગર, ગીર સોમનાથ, આણંદ, ખેડા, અરવલ્લી, મહીસાગર, દાહોદ, વડોદરા, છોટા ઉદેપુર, ભરૂચ, નર્મદા, સુરત, તાપી, ડાંગ, નવસારી અને વલસાડ જિલ્લામાં છૂટાછવાયા સ્થળોએ હળવાથી મધ્યમ વરસાદ પડી શકે છે, જ્યારે ઉત્તર ગુજરાત અને અન્ય કેટલાક વિસ્તારોમાં વાતાવરણ મોટાભાગે સૂકું રહેવાની શક્યતા છે.
હવામાન વિભાગના અનુમાન મુજબ 16થી 18 જુલાઈ દરમિયાન રાજ્યમાં વરસાદી પ્રવૃત્તિમાં વધારો થવાની સંભાવના છે. દેવભૂમિ દ્વારકા, પોરબંદર, રાજકોટ, જૂનાગઢ, ગીર સોમનાથ, અમરેલી, ભાવનગર, બોટાદ, સુરેન્દ્રનગર, અમદાવાદ, ગાંધીનગર, સાબરકાંઠા, અરવલ્લી, મહીસાગર, ખેડા, આણંદ, પંચમહાલ, દાહોદ, વડોદરા, ભરૂચ, નર્મદા, સુરત, તાપી, નવસારી, ડાંગ અને વલસાડ જિલ્લામાં હળવાથી મધ્યમ વરસાદ નોંધાઈ શકે છે. જોકે મહેસાણા, કચ્છ, જામનગર સહિતના કેટલાક જિલ્લાઓમાં નોંધપાત્ર વરસાદની શક્યતા ઓછી હોવાનું અનુમાન છે.
હવામાન વિભાગના જણાવ્યા અનુસાર ચોમાસાની ટ્રફ લાઇન હાલમાં શ્રીગંગાનગર, હિસ્સાર, મેરઠ, શાહજહાંપુર, ગોરખપુર, મુઝફ્ફરપુર અને દક્ષિણ આસામમાંથી પસાર થઈ રહી છે. ઉપરાંત મધ્ય ટ્રોપોસ્ફિયરમાં દરિયાઈ સપાટીથી આશરે 5.8 કિલોમીટરની ઊંચાઈએ સક્રિય વેસ્ટર્ન ડિસ્ટર્બન્સ કાર્યરત છે. રાજ્યમાં નીચલા સ્તરે દક્ષિણ-પશ્ચિમ દિશાના ભેજયુક્ત પવનો સતત ફૂંકાઈ રહ્યા હોવાથી આગામી દિવસોમાં વરસાદી પ્રવૃત્તિમાં વધારો થવાની શક્યતા વ્યક્ત કરવામાં આવી છે.
હવામાનમાં આ સંભવિત ફેરફારને કારણે ખેડૂતો સહિત સામાન્ય લોકોને ગરમી અને ઉકળાટમાંથી રાહત મળવાની આશા વ્યક્ત કરવામાં આવી રહી છે. જોકે વરસાદની તીવ્રતા અને વિસ્તાર અંગે આગામી દિવસોમાં હવામાન વિભાગ દ્વારા નવી આગાહી જાહેર કરવામાં આવશે.
