બ્રિક્સ: શિખર સંમેલન દ્વારા ભારતે ફરી એકવાર વિશ્વમાં પોતાની કૂટનીતિનો દબદબો દેખાડ્યો છે. આ સમિટના સ્વાગત સંબોધનમાં જ પીએમ મોદીએ દુનિયાને સ્પષ્ટ સંદેશ આપતા સાફ કહ્યું કે- UNSCમાં સુધારાને હવે ટાળી શકાય તેમ નથી. પીએમ મોદીએ ભારત મંડપમમાં બ્રિક્સ સભ્ય દેશોના પ્રતિનિધિઓના સ્વાગત બાદ પોતાના સંબોધનમાં સંયુક્ત રાષ્ટ્ર સુરક્ષા પરિષદ(UNSC)માં સુધારાની મોટી માંગ ઉઠાવી.
પીએમ મોદીએ પ્રતિનિધિત્વની વાત કરતા સ્પષ્ટ શબ્દોમાં કહ્યું કે યુએન સિક્યોરિટી કાઉન્સિલમાં રિફોર્મ હવે વધુ સમય ટાળી શકાય નહીં. તેને નિશ્ચિત સમયમર્યાદા સાથે જોડવું પડશે, નાણાકીય સંસ્થાઓમાં પણ પ્રમાણસર ભાગીદારી વધે, મતાધિકારની તાકાત વધે અને ગ્લોબલ ગવર્નન્સમાં પણ.
ગ્લોબલ સાઉથ માટે સમાન ભાગીદારી અને બ્રિક્સ સુધારણા રોડમેપનો પ્રસ્તાવ : આજે, ગ્લોબલ સાઉથ વૈશ્વિક સંગઠનોમાં તો આગળની હરોળમાં છે, પરંતુ નિર્ણયો લેવાની પ્રક્રિયામાં પાછળની હરોળમાં જ રહે છે. આપણે ‘વિશેષાધિકારના પિરામિડ’ને ‘ભાગીદારીના મંચ’માં બદલવો પડશે. જ્યાં દરેક દેશનો અવાજ સાંભળવામાં આવે, દરેક સભ્યની ભાગીદારી હોય, અને દરેક પ્રયાસના કેન્દ્રમાં માનવતાની પ્રગતિ હોય.
આ માટે, મારો પ્રસ્તાવ છે કે આપણે મળીને વૈશ્વિક શાસનમાં સુધારા માટે 10 પ્રસ્તાવ તૈયાર કરીએ, જેને આપણે આગામી શિખર સંમેલન સુધી ‘બ્રિક્સ સુધારણા રોડમેપ’નું રૂપ આપવાનો પ્રયાસ કરી શકીએ.
પ્રતિનિધિત્વ, જવાબદારી અને નિયમોના આધારે વૈશ્વિક સંસ્થાઓમાં બદલાવની જરૂર : પીએમ મોદીએ આગળ કહ્યું કે-‘આ રોડમેપ તૈયાર કરતી વખતે આપણે 3 મુખ્ય સ્તંભો પર ધ્યાન આપવું પડશે: પ્રતિનિધિત્વ, જવાબદારી અને નિયમો બનાવવા. સૌથી પહેલાં, પ્રતિનિધિત્વ વિશે, હું એ કહેવા માંગુ છું કે સંયુક્ત રાષ્ટ્ર સુરક્ષા પરિષદમાં સુધારાઓમાં હવે વધુ વિલંબ કરી શકાય નહીં.
આ બાબતમાં, લેખિત વાતચીતને એક નિશ્ચિત સમય-મર્યાદા અને સ્પષ્ટ, નક્કર પરિણામો સાથે જોડવી જોઈએ. તેવી જ રીતે, આંતરરાષ્ટ્રીય નાણાકીય સંસ્થાઓમાં વોટિંગ પાવર, નેતૃત્વના પદો અને નીતિગત પ્રાથમિકતાઓ આજની આર્થિક વાસ્તવિકતાને અનુરૂપ હોવી જોઈએ.Loading tweet…
દિલ્હી સમિટમાં એકતરફી યુદ્ધ વિરુદ્ધ સભ્ય દેશો વચ્ચે સર્વસંમતિ સધાઈ : ભારતની યજમાનીમાં દિલ્હીમાં યોજાઈ રહેલી આ સમિટમાં રશિયા, ચીન, દક્ષિણ આફ્રિકા, બ્રાઝિલ સહિત તમામ સભ્ય દેશોના પ્રતિનિધિઓ સામેલ થઈ રહ્યા છે. આ સમિટ સાથે જોડાયેલી સૌથી મોટી વાત એ સામે આવી છે કે તમામ સભ્ય દેશો વચ્ચે સમાન ઘોષણાપત્રના એજન્ડાને લઈને સંમતિ બની ગઈ છે.
સમાન ઘોષણાપત્રમાં તમામ સભ્ય દેશો વચ્ચે એકતરફી યુદ્ધની વિરુદ્ધ પ્રસ્તાવ પર સંમતિ બની ગઈ છે. આજે બપોરે 2 વાગ્યા પછી તમામ સભ્ય દેશોના પ્રતિનિધિઓ ભારત મંડપમ પહોંચ્યા. જ્યાં પીએમ મોદીએ તમામ સભ્ય દેશોના પ્રતિનિધિઓનું ઉષ્માભર્યું સ્વાગત કર્યું.
બ્રિક્સ પ્રતિનિધિઓનું ઔપચારિક સ્વાગત : ભારત મંડપમમાં બ્રિક્સ સભ્ય દેશોના પ્રતિનિધિઓનું ઔપચારિક સ્વાગત કર્યા પછી તમામ દેશોના પ્રતિનિધિઓને પીએમ મોદીએ સંબોધિત પણ કર્યા. પીએમ મોદીએ તમામ સભ્ય દેશોના પ્રતિનિધિઓનું બ્રિક્સ સમિટમાં સ્વાગત કરતા પોતાના સંબોધનમાં કહ્યું- આપ સૌનું સ્વાગત અને અભિવાદન કરતા મને અત્યંત આનંદ થઈ રહ્યો છે. 350થી વધુ બેઠકોનું આયોજન, 30 શહેરોમાં તમારી ટીમનું સ્વાગત કરવાની અમને તક મળી. ભારતને બ્રિક્સ સમિટનું આયોજન કરવામાં આપ સૌની મદદ માટે ધન્યવાદ.
