અમદાવાદઃ ગુજરાતના સૌથી મોટા અને વિશ્વપ્રસિદ્ધ લોકોત્સવ એવા નવરાત્રિ મહોત્સવને હવે ગણતરીના દિવસો બાકી રહ્યા છે, ત્યારે રાજ્યભરના ખેલૈયાઓ માટે અત્યંત આનંદદાયક અને ઉત્સાહવર્ધક સમાચાર સામે આવ્યા છે. ગુજરાત સરકાર દ્વારા આ વર્ષે પણ નવરાત્રિ દરમિયાન ખેલૈયાઓને મોડી રાત સુધી કે આખી રાત ગરબે ઘૂમવાની છૂટછાટ મળવાના સ્પષ્ટ સંકેતો મળી રહ્યા છે. ગાંધીનગર ખાતે એક જાહેર કાર્યક્રમ દરમિયાન રાજ્યના ગૃહમંત્રી હર્ષ સંઘવીએ આપેલા નિવેદનથી ગરબા રસિકોમાં અત્યારથી જ ભારે થનગનાટ જોવા મળી રહ્યો છે.મંચ પરથી મંત્રીએ પૂછ્યો સવાલ અને જનમેદનીએ ગજવ્યો હોલ
ગાંધીનગર સ્થિત એક કાર્યક્રમમાં ઉપસ્થિત રહેલા હર્ષ સંઘવીએ પોતાના સંબોધન દરમિયાન નવરાત્રિના ઉત્સવનો ઉલ્લેખ કર્યો હતો. તેમણે મંચ પરથી ઉપસ્થિત વિશાળ જનમેદની સાથે સીધો સંવાદ સાધતા પૂછ્યું હતું કે, તમે નવરાત્રિમાં કેટલા વાગ્યા સુધી ગરબા રમો છો? ગૃહમંત્રીના આ અણધાર્યા અને ઉત્સાહપૂર્ણ પ્રશ્નના જવાબમાં હોલમાં હાજર તમામ યુવાનો અને લોકોએ એકસૂરે અને પૂરા જોશ સાથે પોકાર કર્યો હતો – આખી રાત. જનમેદની તરફથી મળેલા આ જોરદાર પ્રતિસાદ બાદ તેમણે પણ હળવાશ અને ઉત્સાહભર્યા અંદાજમાં આ વર્ષે પણ ગરબા રસિકો માટે આખી રાત ગરબા રમવાની છૂટ ચાલુ રાખવાના સકારાત્મક સંકેતો આપ્યા હતા. સતત બીજા વર્ષે પણ રાત્રિ છૂટછાટનો સિલસિલો જળવાઈ રહેશે
ઉલ્લેખનીય છે કે, ગુજરાતમાં નવરાત્રિ દરમિયાન રાત્રિના12 વાગ્યા પછી લાઉડસ્પીકર અને ગરબા બંધ કરવાના નિયમો વચ્ચે સરકાર સામાન્ય રીતે જાહેર હિત અને તહેવારના ઉત્સાહને ધ્યાને રાખી ખાસ છૂટછાટ આપતી હોય છે. ગત વર્ષોમાં પણ રાજ્ય સરકારે મોડી રાત સુધી ગરબા રમવાની પરવાનગી આપી હતી, જેને સમગ્ર રાજ્યના યુવાધને આવકારી હતી. હવે જ્યારે આ વર્ષે પણ આવા જ સંકેતો સાંપડ્યા છે, ત્યારે ખેલૈયાઓમાં સોલિડ ઉત્સાહ ફેલાયો છે. આખી રાત ગરબા રમવાની સંભવિત છૂટને માત્ર ખેલૈયાઓ જ નહીં પરંતુ આર્થિક રીતે સંકળાયેલા તમામ વર્ગો વધાવી રહ્યા છે. મોડી રાત સુધી ગરબા ચાલવાના કારણે રાજ્યના મુખ્ય શહેરોમાં આવેલી ખાણીપીણીની બજારો અને સ્ટોલ્સ વહેલી સવાર સુધી ધમધમતા રહેશે.
મોડી રાત સુધી વાહનવ્યવહારની સુવિધા તેમજ મહિલાઓની સલામતી માટે પોલીસ તંત્ર દ્વારા સઘન પેટ્રોલિંગ અને સીસીટીવી વોચ ગોઠવવામાં આવશે. સમયમર્યાદા હળવી થવાથી મોટા પાયે આયોજન કરતા કમર્શિયલ તેમજ શેરી ગરબા મંડળોને મોટી રાહત મળશે. હર્ષ સંઘવીના આ હકારાત્મક વલણ બાદ હવે રાજ્ય ગૃહ વિભાગ તરફથી સત્તાવાર ગાઇડલાઇન અને સમયમર્યાદા અંગેની સત્તાવાર જાહેરાત ક્યારે કરવામાં આવે છે તેના પર સમગ્ર ગુજરાતની નજર મંડાયેલી છે.
