જનસેવા અને સામાજિક સમરસતાની ભાવના સાથે નવરાત્રી ગરબી મંડળીઓમાં સેવાકીય પહેલ
મોરબી, ૨૦ ઓક્ટોબર: મોરબી મહાનગરપાલિકાના વોર્ડ નં. ૩માં નવરાત્રી પર્વ નિમિત્તે કોર્પોરેટર ભુપતભાઈ જારીયા અને જીજ્ઞેશભાઈ કૈલા દ્વારા વોર્ડની તમામ નવરાત્રી ગરબી મંડળીઓમાં ૧૦૦૦થી વધુ દીકરીઓને લાણીનું વિતરણ કરવામાં આવ્યું હતું. જનસેવા અને સામાજિક સમરસતાની ભાવનાને પ્રાધાન્ય આપતી આ પહેલ દ્વારા તહેવારની ખુશીઓ દીકરીઓ સાથે વહેંચવાનો ઉમદા પ્રયાસ કરવામાં આવ્યો હતો.
આ સેવાકીય પ્રવૃત્તિ અંતર્ગત વૃંદાવન પાર્ક, રામકૃષ્ણનગર, વિકાસ પાર્ક, ભાગ્યલક્ષ્મી સોસાયટી, રામકૃષ્ણ સ્કૂલ સામેનો વિસ્તાર, વર્ધમાન નગર સહિત વોર્ડના વિવિધ વિસ્તારોની નવરાત્રી ગરબી મંડળીઓને આવરી લેવામાં આવી હતી. ગરબી મંડળીઓમાં લાણીનું વિતરણ કરી દીકરીઓ સાથે નવરાત્રી પર્વની ખુશીઓ વહેંચવામાં આવી હતી.
‘સેવા પરમો ધર્મ’ના મંત્રને સાર્થક કરતી આ પહેલથી દીકરીઓમાં આનંદની લાગણી જોવા મળી હતી. સાથે જ સમાજમાં પરસ્પર સહયોગ, આત્મીયતા અને એકતાની ભાવનાને પ્રોત્સાહન મળ્યું હતું.
જનસંપર્કની સાથે સામાજિક જવાબદારી નિભાવવાના અભિગમથી યોજાયેલી આ પ્રવૃત્તિ વોર્ડ નં. ૩માં લોકસેવા અને સેવાભાવનાનું પ્રેરણાદાયી ઉદાહરણ બની હતી.
