જેતપર, તા. 8 જુલાઈ: વીજપોલ વળતર સહિત ખેડૂતોના વિવિધ પ્રશ્નોને લઈને છેલ્લા 19 દિવસથી ચાલી રહેલા ખેડૂત આંદોલન હવે નવા તબક્કામાં પ્રવેશી રહ્યું છે. આંદોલનને વધુ વ્યાપક અને સંગઠિત બનાવવા માટે હવે જેતપર ખાતે ગુજરાતના વિવિધ જિલ્લાઓના ખેડૂત આગેવાનોની મહત્વપૂર્ણ બેઠક યોજાનાર છે, જેમાં આગામી રાજ્યવ્યાપી કાર્યક્રમો અને ખેડૂતોના હિતના મુદ્દાઓ પર વિસ્તૃત ચર્ચા કરવામાં આવશે.
આંદોલનકારીઓએ જણાવ્યું છે કે 19 દિવસના ઉપવાસ અને સતત લડત બાદ હવે ખેડૂતોની એકતા વધુ મજબૂત બની છે. રાજ્યના અંદાજે 23 જિલ્લાઓમાંથી ખેડૂત આગેવાનો બેઠકમાં જોડાશે અને ખેડૂતોના પ્રશ્નોના ઉકેલ માટે એકજૂટ થઈ આગળની રણનીતિ નક્કી કરશે.
બેઠક દરમિયાન ખેડૂતોને યોગ્ય વળતર આપવાની માંગ, ખેડૂતોને અસર કરતી નીતિઓ પર પુનર્વિચાર કરવાની જરૂરિયાત તેમજ ખેડૂતોને વિશ્વાસમાં લઈને નિર્ણયો લેવાની બાબતો મુખ્ય એજન્ડા તરીકે ચર્ચાશે. સાથે જ રાજ્યવ્યાપી જનજાગૃતિ અભિયાન, સંગઠન મજબૂત કરવાની કામગીરી અને આગામી આંદોલનાત્મક કાર્યક્રમો અંગે પણ નિર્ણય લેવાશે.
આંદોલન સાથે જોડાયેલા આગેવાનોનું કહેવું છે કે ખેડૂતોના હક્ક અને ન્યાય માટેની આ લડત કોઈ એક વિસ્તાર પૂરતી મર્યાદિત નથી, પરંતુ સમગ્ર રાજ્યના અન્નદાતાઓના હિત સાથે જોડાયેલી છે. જ્યાં સુધી ખેડૂતોને ન્યાય નહીં મળે ત્યાં સુધી આ લડત સતત ચાલુ રહેશે.
ખેડૂત સંગઠન દ્વારા રાજ્યભરના ખેડૂતોને વધુ સંખ્યામાં બેઠકમાં જોડાઈ એકતા દર્શાવવા અપીલ કરવામાં આવી છે, જેથી ખેડૂતોના પ્રશ્નોના ન્યાયસંગત નિરાકરણ માટે સરકાર સમક્ષ મજબૂત અવાજ ઉઠાવી શકાય.
