મોરબી શહેર અને આસપાસના વિસ્તારોમાં ગુરુવારે રાત્રીના લગભગ 11 વાગ્યા બાદ વાતાવરણમાં અચાનક પલટો આવ્યો હતો અને મેઘરાજાએ ફરી એન્ટ્રી કરતા અનેક વિસ્તારોમાં વરસાદ શરૂ થયો હતો. વરસાદની શરૂઆત સાથે ઠંડા પવનો ફૂંકાતા છેલ્લા કેટલાક દિવસોથી અનુભવાઈ રહેલી ગરમી અને ઉકળાટમાંથી લોકોને રાહત મળી હતી. રાજ્યમાં આગામી દિવસોમાં પણ વરસાદી માહોલ યથાવત રહેવાની હવામાન વિભાગની આગાહી વચ્ચે મોરબીમાં પણ મોડી રાત્રે વરસાદ વરસતા ચોમાસાનું વાતાવરણ ફરી ખીલ્યું હતું.
શહેરના વિવિધ વિસ્તારોમાં હળવાથી મધ્યમ વરસાદ નોંધાયો હતો. વરસાદ શરૂ થતાં માર્ગો પર વાહનોની અવરજવરમાં થોડી અસર જોવા મળી હતી, જ્યારે કેટલાક લોકો વરસાદની મજા માણવા બહાર નીકળ્યા હતા. ખેડૂતોમાં પણ વરસાદને લઈ ખુશીનો માહોલ જોવા મળ્યો હતો, કારણ કે ખેતી માટે આ વરસાદ લાભદાયી સાબિત થઈ શકે છે.
હવામાન વિભાગે આગામી દિવસોમાં પણ રાજ્યના અનેક વિસ્તારોમાં ભારેથી અતિભારે વરસાદની શક્યતા વ્યક્ત કરી છે. જેના પગલે નાગરિકોને નીચાણવાળા વિસ્તારોમાં સાવચેતી રાખવા તેમજ બિનજરૂરી મુસાફરી ટાળવાની સલાહ આપવામાં આવી છે.
