{{DK_SUBHEADING}}
મોરબીમાં: નાયબ મુખ્યમંત્રી હર્ષ સંઘવીના વર્ચ્યુઅલ અધ્યક્ષસ્થાને તથા શ્રમ અને રોજગાર મંત્રી કાંતિભાઈ અમૃતિયાની વિશેષ ઉપસ્થિતિમાં ન્યૂ એરા સ્કૂલ ખાતે મોરબી જિલ્લા કક્ષાના રૂ. 22.1 કરોડના ખર્ચે નિર્મિત આધુનિક રમતગમત સંકુલનું લોકાર્પણ કરવામાં આવ્યું હતું. આ સાથે હળવદ તાલુકા કક્ષાના રૂ. 9.6 કરોડના ખર્ચે નિર્મિત રમતગમત સંકુલનું પણ લોકાર્પણ કરાયું હતું. પ્રસંગે રાજ્યકક્ષાના “શક્તિદૂત-2.0” કાર્યક્રમનું જીવંત પ્રસારણ પણ કરવામાં આવ્યું હતું.
આ પ્રસંગે શ્રમ અને રોજગાર મંત્રી કાંતિભાઈ અમૃતિયાએ જણાવ્યું હતું કે, ખેલાડીઓના સર્વાંગી વિકાસ માટે રાજ્ય સરકાર કટિબદ્ધ છે. રાજ્ય સરકાર દ્વારા ખેલાડીઓને આર્થિક સહાય, વૈજ્ઞાનિક તાલીમ અને આધુનિક રમતગમતની સુવિધાઓ ઉપલબ્ધ કરાવવા સતત કામગીરી કરવામાં આવી રહી છે.
મોરબીમાં નિર્માણ પામેલા આધુનિક સ્પોર્ટ્સ કોમ્પ્લેક્સથી જિલ્લાના રમતવીરોને ઘરઆંગણે જ શ્રેષ્ઠ રમતગમત સુવિધાઓ ઉપલબ્ધ થશે. આ સુવિધાઓનો લાભ મેળવી મોરબીના ખેલાડીઓ રાજ્ય, રાષ્ટ્રીય અને આંતરરાષ્ટ્રીય કક્ષાની સ્પર્ધાઓમાં વધુ સારો દેખાવ કરી શકશે.
મંત્રી કાંતિભાઈ અમૃતિયાએ જણાવ્યું હતું કે, વિદ્યાર્થીઓ અભ્યાસની સાથે રમતગમત અને સ્પર્ધાત્મક પરીક્ષાઓમાં પણ સફળતા પ્રાપ્ત કરે તે માટે તેમને યોગ્ય માર્ગદર્શન મળવું જરૂરી છે. જિલ્લાના અધિકારીઓ અને પદાધિકારીઓ વિદ્યાર્થીઓ સાથે સમયાંતરે સંવાદ કરી તેમને આગળ વધવા માટે માર્ગદર્શન આપે તેવી સૂચના તેમણે આપી હતી.
સ્પોર્ટ્સ કોમ્પ્લેક્સ તથા રમતગમતની પ્રવૃત્તિઓના વિકાસ માટે જમીન ફાળવવા બદલ મંત્રી કાંતિભાઈ અમૃતિયાએ કલેક્ટર સ્વપ્નિલ ખરેની પ્રશંસા કરી હતી.
મોરબીના મેયર ઉત્તમભાઈ સુરાણીએ જણાવ્યું હતું કે, રાજ્ય સરકાર દ્વારા “રમશે ગુજરાત, જીતશે ગુજરાત” અને “ખેલ મહાકુંભ” સહિતના વિવિધ આયોજન થકી રમતવીરોને પ્રોત્સાહન આપવામાં આવી રહ્યું છે. વધુમાં વધુ રમતવીરો વિવિધ સ્પર્ધાઓમાં ભાગ લે અને તેમની પ્રતિભાને યોગ્ય તક મળે તે માટે આધુનિક રમતગમતની સુવિધાઓ ઊભી કરવામાં આવી છે.
ધારાસભ્ય દુર્લભજીભાઈ દેથરીયાએ જણાવ્યું હતું કે, ગુજરાત સરકાર દ્વારા દરેક જિલ્લા અને તાલુકા મથકે સ્પોર્ટ્સ કોમ્પ્લેક્સનું નિર્માણ થાય તે માટે સતત પ્રયાસો કરવામાં આવી રહ્યા છે, જેથી રમતવીરોને તાલીમ અને સ્પર્ધા માટે જિલ્લા બહાર જવું ન પડે.
મોરબી જિલ્લા કક્ષાના સ્પોર્ટ્સ કોમ્પ્લેક્સમાં ઇન્ડોર અને આઉટડોર રમતગમતની વિવિધ આધુનિક સુવિધાઓ ઉપલબ્ધ કરાવવામાં આવી છે. તેમાં બેડમિન્ટન, 10 મીટર શૂટિંગ રેન્જ, જિમ્નેશિયમ, ટેબલ ટેનિસ, ઇન્ડોર બાસ્કેટબોલ, બોર્ડ ગેમ્સ, 200 મીટર સિન્થેટિક એથ્લેટિક ટ્રેક, વોલીબોલ, સિન્થેટિક ટેનિસ કોર્ટ, સિન્થેટિક બાસ્કેટબોલ, ખો-ખો, કબડ્ડી, હોકી અને આર્ચરી જેવી સુવિધાઓનો સમાવેશ થાય છે.
હળવદ તાલુકા કક્ષાના સ્પોર્ટ્સ કોમ્પ્લેક્સમાં બેડમિન્ટન, 10 મીટર શૂટિંગ રેન્જ અને ટેબલ ટેનિસ જેવી ઇન્ડોર સુવિધાઓ ઉપરાંત એથ્લેટિક ટ્રેક, વોલીબોલ, કબડ્ડી અને ખો-ખો જેવી આઉટડોર રમતગમતની સુવિધાઓ ઉપલબ્ધ કરાવવામાં આવી છે.
આ પ્રસંગે ડેપ્યુટી મેયર ચિરાગ રાણપરા, સ્ટેન્ડિંગ કમિટી ચેરમેન જયંતિભાઈ પડસુંબિયા, અગ્રણી જયંતિભાઈ રાજકોટિયા, ટ્રસ્ટી અતુલભાઈ પાડલિયા, કલેક્ટર સ્વપ્નિલ ખરે, મ્યુનિસિપલ કમિશનર સંગીતાબેન રૈયાણી, પ્રાંત અધિકારી પ્રવીણસિંહ જેતાવત, રમતગમત અધિકારી રવિકુમાર ચૌહાણ સહિત પદાધિકારીઓ, અધિકારીઓ તથા વિદ્યાર્થીઓ ઉપસ્થિત રહ્યા હતા.
