મોરબી: મોરબીની એક મોટી ખાનગી બેંક દ્વારા IPO અરજીની પ્રક્રિયામાં થયેલી કથિત બેદરકારીને કારણે શિક્ષક રવિભાઈ રાજાને થયેલા નાણાકીય નુકસાનના મામલે તેમને રૂ. 50,000નું વળતર મળ્યું છે. સતત રજૂઆત, ગ્રાહક સુરક્ષા ક્ષેત્રના માર્ગદર્શન તથા કાનૂની નોટિસ બાદ બેંક દ્વારા કોર્ટમાં કેસ દાખલ થાય તે પહેલાં જ વળતર ચૂકવવામાં આવ્યું હતું.
મળતી માહિતી મુજબ, રવિભાઈ રાજાએ IPO માટેની અરજી બેંકમાં સમયસર રજૂ કરી હતી. જોકે, બેંક તરફથી IPO અરજીની પ્રક્રિયામાં થયેલી કથિત બેદરકારીને કારણે અરજી સમયસર પ્રક્રિયાધીન થઈ શકી નહોતી અને તેના પરિણામે તેમને સંભવિત નાણાકીય નુકસાન થયું હતું. આ મામલે તેમણે પોતાના હક માટે સતત અને મક્કમ રજૂઆત શરૂ કરી હતી.
શરૂઆતમાં બેંક તરફથી સંતોષકારક ઉકેલ ન મળતાં રવિભાઈ રાજાએ બેંકના HR વિભાગ તેમજ ઉચ્ચ અધિકારીઓ સમક્ષ આશરે 30 જેટલા ઈ-મેઇલ કરીને સમગ્ર મામલાની વારંવાર રજૂઆત કરી હતી અને યોગ્ય ન્યાય તથા વળતરની માંગ કરી હતી.
આ મામલે ગ્રાહક સુરક્ષા ક્ષેત્રે માર્ગદર્શન આપનાર લાલજીભાઈ મહેતા અને રામભાઈ મહેતાની સલાહ પણ મહત્વપૂર્ણ રહી હતી. ત્યારબાદ લાલજીભાઈ મહેતા તેમજ વકીલ આશિષભાઈ મુલિયા દ્વારા બેંકને કાયદાકીય નોટિસ પાઠવી રવિભાઈ રાજાના હિતમાં યોગ્ય વળતર અને ન્યાયની માંગ કરવામાં આવી હતી.
આ સમગ્ર કાર્યવાહી બાદ અને કોર્ટમાં કેસ દાખલ કરવામાં આવે તે પહેલાં જ બેંકે સમગ્ર મામલાને ગંભીરતાથી લઈ રવિભાઈ રાજાને રૂ. 50,000નું વળતર ચૂકવ્યું હતું. પરિણામે તેમને નાણાકીય રાહત મળી હતી.
રવિભાઈ રાજાએ જણાવ્યું હતું કે ગ્રાહકોને પોતાના અધિકારોની જાણકારી હોવી અત્યંત જરૂરી છે. બેંકિંગ સેવાઓમાં કોઈ ક્ષતિ જણાય અથવા ગ્રાહકને નુકસાન થાય ત્યારે નિરાશ થયા વિના યોગ્ય માધ્યમથી ફરિયાદ રજૂ કરવી જોઈએ. સતત અને યોગ્ય રજૂઆતથી ગ્રાહકને ન્યાય મળવાની શક્યતા વધી શકે છે.
તેમણે પોતાના હક માટેની લડત દરમિયાન માર્ગદર્શન અને સહયોગ આપવા બદલ લાલજીભાઈ મહેતા, રામભાઈ મહેતા તથા વકીલ આશિષભાઈ મુલિયાનો હૃદયપૂર્વક આભાર વ્યક્ત કર્યો હતો. તેમના જણાવ્યા મુજબ યોગ્ય માર્ગદર્શન, સહકાર અને કાયદાકીય સલાહના કારણે સમગ્ર મામલાને યોગ્ય દિશા મળી અને અંતે બેંક પાસેથી રૂ. 50,000નું વળતર મેળવવામાં સફળતા મળી.
આ ઘટના અન્ય ગ્રાહકો માટે પણ એક મહત્વપૂર્ણ સંદેશ આપે છે કે બેંકિંગ અથવા અન્ય નાણાકીય વ્યવહારમાં કોઈ પ્રકારનું નુકસાન થાય ત્યારે પોતાના અધિકારો અંગે જાગૃત રહેવું જોઈએ. યોગ્ય સમયે યોગ્ય વ્યક્તિ પાસેથી સલાહ મેળવી કાયદેસર રીતે સતત રજૂઆત કરવામાં આવે તો ગ્રાહક પોતાના હક માટે યોગ્ય ન્યાય મેળવી શકે છે.
